لاہور(سپورٹس رپورٹر) پاکستان سپر لیگ اپنی کارپوریٹ سماجی ذمہ داری کے حصے کے طور پر ایک بار پھر بچپن کے کینسر سے آگاہی کے دن منارہی ہے۔بچپن کے کینسر سے آگاہی کا دن آج 3 مئی کو منایا جائیگا۔اس موقع پر ٹیمیں ، میچ آفیشلز اور کمنٹیٹرز اس اہم مہم کو اجاگر کریں گے۔ سلمان نصیر چیف ایگزیکٹیو آفیسرپی ایس ایل نے کہا کہ ہم ٹیموں، کھلاڑیوں، کمنٹیٹرز ، شائقین اور میڈیا کے دوستوں کے شکر گزار ہیں کہ انہوں نے پی ایس ایل کے ذریعے آگاہی کی ان کوششوں کو فروغ دینے میں مسلسل تعاون کیاہے۔ میچ آفیشلز اور میچ کمنٹیٹرز گولڈ ربن پہنیں گے جو بچپن کے کینسر سے متعلق آگاہی مہم کی علامت  ہے۔ گلیڈی ایٹرز اور یونائیٹڈ کے کھلاڑی گولڈن کیپس کیساتھ ساتھ گولڈ ربن بھی پہنیں گے۔میچ کیلئے استعمال ہونے والے وکٹس گولڈن کلر کی ہونگی۔ کینسر کے تین مریضوں کو گراؤنڈ میں مدعو کیا جائیگا جہاں انہیں دونوں ٹیموں کی جانب سے دستخط شدہ شرٹس پیش کی جائیں گی۔ بچپن کے کینسر سے متعلق آگاہی کے پیغامات سٹیڈیم میں رکھی گئی ڈیجیٹل سکرینوں پر آویزاں کیے جائیں گے۔