لاہور(خصوصی نامہ نگار) پاکستان مرکزی مسلم لیگ کے جوائنٹ سیکرٹری قاری محمد یعقوب شیخ نے کہا ’’صلاحیت بڑھاؤ،اپنا کماؤ‘‘ مہم کے تحت ملک بھر سے نوجوان رجسٹریشن کروا رہے ہیں۔ بڑھتی مایوسی اور بے روزگاری کے خاتمے کیلئے اپنا کماؤ پروگرام انتہائی اہم ہے۔ نوجوانوں کی تربیت کر کے انہیں مفت ہنر فراہم کرنا مرکزی مسلم لیگ کے منشور خدمت کی سیاست کا عملی نمونہ ہے۔ ان خیالات کا اظہار انہوں نے اہلسنت والجماعت کے سربراہ مولانا علامہ احمد لدھیانوی سے ملاقات میںکیا۔ علامہ احمد لدھیانوی نے پاکستان مرکزی مسلم لیگ کے مرکزی سیکرٹریٹ کا دورہ کیا۔ ملاقات میںرابطہ علماء و مشائخ پاکستان کے سیکرٹری سید عبدالوحید شاہ اور پاکستان مرکزی مسلم لیگ لاہور کے جنرل سیکرٹری ڈاکٹر مزمل اقبال ہاشمی بھی موجود تھے۔علامہ احمد لدھیانوی نے مرکزی مسلم لیگ کے ڈیجیٹل روزگار پروگرام کو سراہتے ہوئے کہا یہ اقدام نوجوانوں کو خودمختار بنانے کی جانب ایک مثبت قدم ہے۔ملاقات کے دوران ملکی سیاسی صورتحال، بھارت کی جانب سے غیر ذمہ دارانہ اقدامات، اور غزہ پر اسرائیلی حملوں پر تفصیلی تبادلہ خیال کیا گیا۔ قاری محمد یعقوب شیخ نے کہا بھارت کی آبی جارحیت کیخلاف مرکزی مسلم لیگ تحریک جاری رکھ کر قوم کو متحد وبیدار کریگی۔ملک بھر میں 50 ہزار سے زائد رجسٹریشن ہو چکی ہیں۔