لاہور(سپورٹس رپورٹر)ا یران اور ارجنٹائن نے آئندہ سال ہونے والے مینز فیفا ورلڈ کپ کیلئے کوالیفائی کرلیا۔ ایران نے تہران کے آزادی سٹیڈیم میں ورلڈکپ کوالیفائرز ایشیا کے گروپ اے کے میچ میں ازبکستان کیخلاف مقابلہ2-2سے برابر کرکے فٹبال ورلڈ کپ 2026ء کیلئے اپنی جگہ پکی کرلی۔اگلے سال ہونے والے میگا ایونٹ میں کوالیفائی کرنے کیلئے ایران کو ازبکستان کے خلاف صرف میچ ڈرا کرنے کی ضرورت تھی۔ ایک موقع پر ازبکستان کو 82 ویں منٹ تک دو، ایک کی برتری حاصل تھی۔83ویں منٹ میں مہدی تریمی نے  گول کرکے ایران کو خسارے سے نکالا۔پہلے ہاف میں ازبکستان نے 16 ویں منٹ میں کوجیمات کے گول کی بدولت برتری حاصل کی، دوسرے ہاف میں ایران کے مہدی تریمی نے برابر کیا جبکہ اگلے ہی منٹ میں ابوسبیک نے ازبکستان کی جانب سے گول کرکے پھر ٹیم کو برتری دلائی۔83ویں منٹ میں مہدی تریمی نے ایران کیلئے گول کرکے مقابلہ 2-2 گول سے برابر رہا جس کی بدولت ایران کی ٹیم ایک پوائنٹ حاصل کرکے فٹبال ورلڈ کپ کیلئے کوالیفائی کرنے میں کامیاب ہوگئی۔عالمی چیمپئن ارجنٹائن نے روایتی حریف برازیل کو 1-4 سے شکست دیکر 2026 کے فٹبال ورلڈ کپ کیلئے کوالیفائی کرلیا۔ پانچ بار کی عالمی چیمپئن برازیل کی ٹیم اب تک ورلڈ کپ کیلئے کوالیفائی کرنے میں ناکام رہی ہے۔فٹبال ورلڈ کپ اگلے برس امریکہ، کینیڈا اور میکسیکو میں ہوگا جس میں 48ٹیمیں شرکت کریں گی۔ ایران نے مسلسل چوتھی اور مجموعی طور پر ساتویں بار فیفا  کوالیفائی کیا ہے۔