بادل برسانے والا سسٹم پاکستان سے نکل جاتے ہی دھند کی اور شدید سردی کی آمد  نے دستک دے دی۔ محکمہ موسمیات کےماہرین نے پیش گوئی کی ہے کہ  آج بادل برسانے والا سسٹم پاکستان سے نکل گیا ہے، جس کے نتیجے میں آج سے دو تین دن تک موسم سرد رہے گا۔منگل کے روز لاہور میں کم سے کم 6ڈگری سینٹی گریڈ درجہ حرارت ریکارڈ کیا گیا ہے   جب کہ زیادہ سے زیادہ 19 ڈگری سینٹی گریڈ تک جانے کے امکانات ہیں۔ دوسری جانب کراچی میں سائبیرین ہواؤں نے انٹری دے دی، جسم میں چبھنے والی ان ہواؤں نے موسم مزید سرد کردیا ہے۔ سائبیرین ہواؤں کے باوجود شہر قائد میں رات کا درجہ حرارت نو سے گیارہ ڈگری تک برقرار ہے۔ محکمہ موسمیات کے مطابق کراچی میں آئندہ 24 گھنٹوں کے دوران موسم سرد اور خشک رہے گا جبکہ دن بھر 20 سے 35 کلومیٹر فی گھنٹہ کی رفتار سے شمال مشرقی سمت سے ہوائیں چلنے کا امکان ہے۔یخ بستہ ہواؤں کے باعث سردی کی شدت اصل درجہ حرارت سے 2 تا 4 درجے زیادہ محسوس ہو رہی ہے۔ کراچی کا آج کم سے کم درجہ حرارت 13.5 ڈگری سینٹی گریڈ ریکارڈ ہوا جبکہ آئندہ 24 گھنٹوں کے دوران زیادہ سے زیادہ درجہ حرارت 27 اور کم سے کم 11 ڈگری سینٹی گریڈ متوقع ہے۔