لاہور(کامرس رپورٹر) سکیورٹیز اینڈ ایکسچینج کمیشن آف پاکستان نے ’’ٹیکنالوجی پر مبنی ڈسٹری بیوشن چینلز کے ذریعے لائف انشورنس سیونگز پروڈکٹس کی فروخت‘‘ سے متعلق ہدایت نامہ 2025 جاری کیا ہے جس کا مقصد لائف انشورنس سیونگز پروڈکٹس کی ڈیجیٹل تقسیم کیلئے ایک لچکدار اور سازگار ماحول کو فروغ دینا ہے۔یہ ہدایت نامہ تقسیم کاری کو آسان بنانے کیلئے معقول آن بورڈنگ تقاضے متعارف کراتا ہے جبکہ پالیسی ہولڈرز کیلئے بہتر قدر کو یقینی بناتا ہے۔ اس میں کم چارجز کی ساخت لازم قرار دی گئی ہے اور کم خطرے والے سرمایہ کاری کے آلات میں سرمایہ کاری کی شرط عائد کی گئی ہے تاکہ صارفین کیلئے زیادہ تحفظ فراہم کیا جا سکے۔ یہ ہدایت نامہ ڈیجیٹل لائف انشورنس سیونگز پروڈکٹس کی دستیابی کو فروغ دیتا ہے جس کے تحت انشورنس کمپنیوں کو لازم ہے کہ وہ کم از کم ایک پروڈکٹ اپنی ویب سائٹ یا موبائل ایپ کے ذریعے اور ایک آزاد پلیٹ فارم کے ذریعے ایک سال کے اندر پیش کریں۔ کسٹمرکے آن بورڈنگ کے عمل کو آسان بنا کر اس ہدایت نامے سے ملک بھر میں انشورنس کی رسائی بڑھنے اور انشورنس سیکٹر کی ترقی میں مدد ملنے کی توقع ہے۔