اسلام آباد (اپنے سٹاف رپورٹر سے) وفاقی وزیر داخلہ محسن نقوی کی زیر صدارت افغان سٹیزن کارڈ ہولڈرز کی واپسی کے حوالے سے اعلیٰ سطح کا اجلاس منعقد ہوا، جس میں غیر قانونی غیر ملکیوں کی وطن واپسی کے پروگرام (IFRP) کے تحت جاری اقدامات کا جائزہ لیا گیا۔ افغان سٹیزن کارڈ ہولڈرز کو 31 مارچ تک پاکستان رضاکارانہ طور پر چھوڑنے کی ڈیڈ لائن دی گئی ہے۔ اس حوالے سے وفاق اور صوبائی حکومتوں کے درمیان افغان سٹیزن کارڈ ہولڈرز کی واپسی کے حوالے سے مسلسل رابطہ ہے اور صوبائی حکومتوں کو اس ضمن میں وفاق کی جانب سے ہر ممکن تعاون فراہم کیا جائے گا جبکہ وزیراعلی کے پی کے کی تجاویز پر کمیٹی قائم کردی گئی ہے۔ وزیر مملکت داخلہ طلال چوہدری صوبوں کا دورہ کریں گے تاکہ واپسی کے عمل میں پیش آنے والے مسائل کا ازالہ کیا جا سکے۔ وزیر داخلہ محسن نقوی نے غیر ملکیوں سے اچھے برتاؤ کی ہدایت کی۔ اجلاس میں وزیر مملکت داخلہ طلال چوہدری، وفاقی سیکرٹری داخلہ، سیکرٹری کشمیر افیئرز و سیفران، تمام صوبوں کے چیف سیکرٹریز، آئی جیز، ڈی جی ایف آئی اے، آئی جی اسلام آباد پولیس، ڈی سی اسلام آباد، کوآرڈینیٹر نیشنل ایکشن پلان، وزارت خارجہ، وزارت قانون اور سکیورٹی اداروں کے نمائندے شریک ہوئے۔ اجلاس میں بریفنگ دی گئی کہ افغان سٹیزن کارڈ ہولڈرز کی واپسی کے تمام انتظامات مکمل کر لیے گئے ہیں۔ افغان سٹیزن کارڈ ہولڈرز کی میپنگ کا کام بھی مکمل کیا جا چکا ہے جبکہ واپس جانے والوں کے لیے ہولڈنگ سینٹرز، خوراک اور صحت کی سہولیات کے بھی انتظامات کئے گئے ہیں۔