لاہور (نوائے وقت رپورٹ) وزیراعلیٰ پنجاب مریم نواز شریف سے امریکی صدر ڈونلڈ ٹرمپ کے حمایت یافتہ ادارے ''ورلڈ لبرٹی آرگنائزیشن'' کے اعلیٰ سطح کے وفد نے ملاقات کی۔ ورلڈ لبرٹی آرگنائزیشن کے وفد میں زجری فوک مین، زجری وٹ کوف اور چیس ہیرو شامل تھے۔ ملاقات میں پاکستان کرپٹو کونسل کے سربراہ بلال بن ثاقب بھی موجود تھے۔ ملاقات میں بلاک چین اینوویشن(Block chain innovations) ٹوکنائزیشن، رئیل ورلڈ ایسٹس اور سٹیبل ایپلیکیشن پر تبادلہ خیال کیاگیا۔ ملاقات میں بلاک چین ٹیکنالوجی کے فروغ کے منصوبے پر غور کیاگیا۔ معدنیات، ایگریکلچر سمیت پاکستان کے وسیع قدرتی وسائل حقیقی اثاثوں کی ٹوکنائزیش کا جائزہ لیاگیا۔ ڈیجیٹل لین دین میں شفافیت، بہتر کارکردگی اور سکیورٹی امور کیلئے سٹیبل کوائن سلوشن کے نفاذ پر بات چیت کی گئی۔ ملاقات میں ترسیلات زر، مالیاتی لین دین اور عالمی تجارت کے بہتر فریم ورک کی ضرورت پر زور دیاگیا۔ پاکستان کے معاشی اور مالیاتی نظام کو ڈی سینٹرلائزڈ فنانس ماڈل سے مربوط کرنے پر اتفاقِ رائے کیا گیا۔ وزیراعلیٰ مریم نواز شریف نے ورلڈ لبرٹی فنانشل کے وفد کے اختراعی معاشی نظریات کو سراہا۔ وزیراعلیٰ مریم نواز شریف نے پنجاب کو ڈیجٹیل اینوویشن کا ریجنل لیڈر بنانے کے عزم کا اظہار کیا۔ وزیراعلیٰ مریم نواز شریف نے ورلڈ لبرٹی فنانشل وفد کو حکومت پنجاب کی ڈیجیٹل ٹیکنالوجیکل ایڈوانس منٹ اور مالیاتی اشتراک کار کے بارے میں آگاہ کیا۔ وزیراعلیٰ مریم نوازشریف نے کہاکہ پنجاب ڈیجیٹل ٹیکنالوجی اور آن لائن ٹریڈ میں تیزی سے آگے بڑھ رہا ہے۔ علاوہ ازیں وزیراعلیٰ نے خیبر پی کے میں 15 خوارجی دہشتگردوں کے خلاف کامیاب کارروائی پر سکیورٹی فورسز کو شاباش دی ہے۔ مریم نواز نے دہشتگردوں سے مقابلے میں جام شہادت نوش کرنے والے بہادر جوانوں کو خراج عقیدت پیش کیا۔ وزیراعلیٰ نے فیصل آباد میں جھولے سے گر کر بچی کے جاں بحق ہونے پر گہرے غم و غصہ کا اظہار کیا ہے۔ وزیراعلیٰ نے سوگوار خاندان سے اظہار ہمدردی و تعزیت کا اظہار کیا ہے۔ وزیراعلیٰ مریم نواز نے کمشنر فیصل آباد سے رپورٹ طلب کر لی ہے۔ مریم نواز نے ایران کی بندرگاہ پر دھماکے میں قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔ وزیراعلیٰ مریم نواز نے بندر شہید رجائی بندرگاہ پر دھماکے میں زخمیوں کی جلد صحت یابی کی دعا کی۔