لاہور(کامرس رپورٹر) پاکستان بزنس فورم نے کہا ملک کی تمام کاروباری برادری پاکستان کی مسلح افواج کے ساتھ مکمل یکجہتی کا اظہار کرتی ہے۔ میڈیا سے گفتگو کرتے ہوئے صدر پی بی ایف خواجہ محبوب الرحمن نے کہا بھارت کو اب حقیقت کا سامنا کرنے کیلئے تیار رہنا چاہیے۔ ہم نے اپنی طرف سے بہت صبر کیا ہے۔ بھارت کا یہ معمول بن چکا ہے کہ چند سال خاموش رہنے کے بعد اچانک پاکستان پر الزامات لگا کر اپنی ناکامیوں کا ملبہ ہم پر ڈالنے لگتے ہیں جو کہ اب ناقابل قبول ہے۔ فورم نے اعلان کیا کہ اب بھارتی کاروباری برادری کا ہر سطح پر بائیکاٹ کیا جائے گا۔ اس کیساتھ ساتھ سندھ طاس معاہدے کی معطلی جیسے خیالات کو مضحکہ خیز قرار دیا گیا۔ سینئر نائب صدر پی بی ایف آمنہ منور اعوان نے کہا بھارت کی جانب سے پاکستان پر لگائے جانیوالے الزامات بے بنیاد اور جھوٹ کا پلندہ ہیں۔ چوہدری احمد جواد نے مطالبہ کیا کہ جب تک بھارت باہمی احترام اور برابری کی بنیاد پر مسائل حل نہیں کرتا، تب تک مکمل تجارتی بائیکاٹ کیا جائے گا۔ ’’پاکستان سب سے پہلے ہے‘‘ اور یہ ہمارا قومی فریضہ ہے۔