لاہور (خصوصی نامہ نگار) جمہوریت کی بنیاد عوام کے ووٹ کی طاقت پر ہے اور یہ طاقت اس وقت مؤثر ہو سکتی ہے جب عوام کو صحت، تعلیم، روزگار، اور انصاف کی بنیادی سہولیات مہیا ہوں۔ پالیسی سازوں کی ذمہ داری ہے کہ وہ زمینی حقائق کو مدنظر رکھتے ہوئے قومی ترقی کیلئے قابل عمل تجاویز پیش کریں اور ریاستی اداروں کو بہتر حکمت عملی سے مضبوط بنائیں۔ان خیالات کا اظہار سپیکر پنجاب اسمبلی ملک محمد احمد خان نے لاہور کی نجی یونیورسٹی میں بین الاقوامی جمہوریت کانفرنس سے خطاب کرتے ہوئے کیا۔ انہوں نے زور دیا کہ سوشل میڈیا کو قومی بیانیے کے فروغ اور عوامی شعور اجاگر کرنے کیلئے استعمال ہونا چاہیے تاکہ معاشرے میں مثبت سوچ اور ذمہ دار رویوں کو فروغ دیا جا سکے۔ قوموں کی ترقی میں صرف حکومتیں نہیں بلکہ ہر فرد، ہر ادارہ اور ہر طبقہ برابر کا شریک ہوتا ہے اور ہمیں اجتماعی ذمہ داری کو تسلیم کرتے ہوئے اپنا کردار ادا کرنا ہوگا۔انہوںنے کہا پاکستان ایک ایٹمی طاقت ہے۔ افواج پاکستان ایک قابل فخر ادارہ ہے جس کی پیشہ ورانہ مہارت اور قومی خدمت کی تاریخ پر پوری قوم کو ناز ہے۔