اسلام آباد (نمائندہ خصوصی) صدر آصف زرداری سے وزیراعظم شہباز شریف نے ایوان صدر میں ملاقات کی جس میں پی ٹیآئی سے مذاکرات اور مدارس بل پر بات چیت کی گئی۔ اس موقع پر  یوسف رضا گیلانی، مخدوم احمد محمود، اسحاق ڈار، محسن نقوی، فیصل کریم کنڈی،  راجہ پرویز اشرف اور نوید قمر بھی موجود تھے۔ ملاقات میں پی ٹی آئی سے مذاکرات کے حوالے سے تبادلہ خیال کیا گیا۔ پی ٹی آئی کی جانب سے ابتدائی طور پر پیش کیے گئے عمران خان و دیگر قیدیوں کی رہائی اور 9 مئی و 26 نومبر واقعات کی جوڈیشل انکوائری کے مطالبات پر بات کی گئی۔ وزیرِ اعظم نے صدر کی صحت  کے لیے نیک خواہشات کا اظہار کیا۔ ملاقات میں ملک کی مجموعی سیاسی، معاشی اور سکیورٹی صورتحال پر گفتگو کی گئی۔ صدر مملکت اور وزیرِ اعظم نے ملکی ترقی کیلئے مل کر آگے بڑھنے کے عزم کا اعادہ کیا۔ دونوں نے پارلیمنٹ میں قانون سازی کے امور پر بھی بات چیت کی۔ دونوں رہنماؤں نے قانونی امور پر تمام سیاسی سٹیک ہولڈرز کی مشاورت سے آگے بڑھنے کا فیصلہ کیا۔ صدر  نے وزیرِ اعظم کو ملکی ترقی  اور استحکام کیلئے تعاون  کی یقین دہانی کرائی۔