ننکانہ صاحب (نامہ نگار) کمشنر لاہور ڈو1یژن زید بن مقصود نے ننکانہ صاحب کا دورہ کر کے وزیر اعلیٰ پنجاب پروگرامز کے حوالے سے بریفنگ اجلاس کی صدارت کی،کمشنر لاہور نے گردوارہ جنم استھان کا بھی دورہ کیا اور سکھ منتظمین سے ملاقات کی۔ ننکانہ صاحب میں کمشنر لاہور نے وزیراعلی پنجاب کی ترجیحات میں شامل شہری ترقی کے پروگرامز پر عملدرآمد پر بریفنگ لی۔ڈی سی ننکانہ محمد تسلیم اختر راؤ‘ ڈی پی او ننکانہ سید ندیم عباس نے بریفنگ دی۔ اجلاس میں تمام انتظامی افسروں نے شرکت کی۔ کمشنر لاہور ڈویژن کو بابا گرونانک جنم تقریبات انتظامات کے حوالے سے بھی بریفنگ دی گئی۔ بریفنگ میں آگاہ کیا گیاکہ بابا گرونانک دیوجی کی 555 ویں جنم دن کی تقریبات 14 نومبر تا 16 نومبر تک ہونگی۔کمشنر لاہور نے کہا کہ بابا گرونانک کی جنم دن تقریبات میں کئی ممالک سے سکھ زائرین کی بڑی تعداد شرکت کریگی۔ضلعی انتظامیہ جنم دن تقریبات و زائرین کو بہترین سہولیات کی فراہمی کا جامع پلان ترتیب دے۔کمشنر لاہور کو ڈی سی ننکانہ نے صاف ستھرا پنجاب‘ترقیاتی سکمیوں‘ تجاوزات خاتمہ و قائم ماڈل ریڑھی بازاروں پر بریفنگ دی۔کمشنر لاہور نے مین شاہراہ پر انسداد سموگ مہم و شجرکاری مہم کے تحت پھلدار درخت بھی لگایا۔کمشنر لاہور نے ننکانہ شہر میں زیر تعمیر ٹراما سنٹر اور موڑکھنڈا میں انتظامیہ کی جانب سے لگائے منظم ریڑھی بازار کا بھی دورہ کیا۔