اسلام آباد (نیٹ نیوز) خیبر پی کے کی سینٹ نشستوں پر انتخابات کی قرارداد کثرت رائے سے مسترد ہو گئی۔ چیئرمین یوسف رضا گیلانی کی زیر صدارت سینٹ ایڈوائزری کمیٹی کا اجلاس منعقد ہوا جس میں اپوزیشن لیڈر شبلی فراز، وزیر قانونی سینیٹر اعظم نذیر تارڑ، شیری رحمان، عرفان صدیقی اور دیگر نے شرکت کی۔ اجلاس میں سینیٹر شبلی فراز نے خیبر پی کے کی 12 سینٹ نشستوں پر انتخابات کرانے کی قرارداد پیش کر دی۔ شرکاء کی جانب سے اس قرارداد پر بحث کی گئی۔ ایم ڈبلیو ایم کے سوا تمام اراکین نے قرارداد کی مخالفت کی۔ ذرائع کے مطابق عوامی نیشنل پارٹی، جے یو آئی ف، بی اے پی سمیت تمام جماعتوں نے مخالفت کی۔ ایڈوائزی کمیٹی میں اپوزیشن لیڈر شبلی فراز کی کمیٹی اراکین کے ساتھ تلخ جملوں کا تبادلہ بھی ہوا۔ ذرائع حکومتی اراکین کے مطابق انتخابات کرانا الیکشن کمشن کا کام ہے، اس میں مداخلت نہیں کرسکتے۔شبلی فراز نے کہا کہ ہاؤس آف فیڈریشن سے ایک صوبے کی نمائندگی ختم کی جارہی ہے۔ بلوچستان سندھ میں سینٹ ضمنی انتخابات ہو رہے ہیں، خیبر پی کے میں ثانیہ نشتر کی چھوڑی گئی نشست پر بھی الیکشن نہیں کرائے جا رہے۔ انہوں نے مزید کہا کہ اعجاز چوہدری کے پروڈکشن آرڈر پر عمل درآمد نہ ہونا چیئرمین سینٹ کے عہدے کے توہین ہے۔