لاہور(سپورٹس رپورٹر)پاکستان سپر لیگ کے 9ویں میچ میں پشاور زلمی نے ملتان سلطانز کو 120 رنز سے شکست دیدی۔ راولپنڈی سٹیڈیم میں کھیلے گئے میچ میں پشاور زلمی نے ٹاس جیت کر  بیٹنگ کا فیصلہ کیا۔ پشاور زلمی 5 رنز پر ہی کپتان بابر اعظم اور صائم ایوب سے محروم ہوگئی۔ محمد حارث اور ٹام کوہلر کیڈمور کے درمیان 73 رنز کی پارٹنرشپ قائم کی۔ محمد حارث نے 21 گیندوں پر 45 رنز کی اننگز کھیلی۔ ٹام کوہلر کیڈمور نے30 گیندوں پر 52 رنز بنائے۔ حسین طلعت نے 37 رنز سے اپنا حصہ ڈالا۔ عبدالصمد کے 14 گیندوں پر 40 اور مچل اوین کے 15 گیندوں پر 34 رنز نے پشاور زلمی کو 227 کے مجموعے تک پہنچانے میں کلیدی کردار ادا کیا۔ پشاور زلمی نے 7 وکٹوں پر 227 رنز بنائے۔ زلمی کے کھلاڑیوں نے مجموعی طور پر 16 چھکے لگائے۔ ڈیوڈ ویلی، مائیکل بریسویل اور عبید شاہ نے دو دو جبکہ افتخار احمد نے ایک وکٹ لی۔ 228 رنز کے تعاقب میں ملتان سلطانز کی ٹیم 16ویں اوور میں 107 رنز پر آل آؤٹ ہوگئی۔سات کھلاڑی ڈبل فیگر میں بھی داخل نہ ہوسکے ۔ عثمان خان 44‘کپتان محمد رضوان 15‘شائی ہوپ 20اور ڈیوڈ ویلی 13رنز بناکر نمایاں رہے ۔ علی رضا نے 4‘عارف یعقوب نے 3اور مچل اوین نے دو کھلاڑیوں کو آئوٹ کیا ۔ ملتان سلطانز کی یہ مسلسل تیسری شکست ہے جبکہ پشاور زلمی دو میچ ہارنے کے بعد تیسرے میں کامیا ب ہوئی ۔