اسلام آباد (نمائندہ خصوصی) وفاقی وزیر مذہبی امور کی زیر صدارت حج انتظامات کا جائزہ اجلاس ہوا۔ سیکرٹری مذہبی امور سید عطاء الرحمن سمیت اعلیٰ حکام نے بریفنگ دی، حاجی کیمپوں میں ویکسین کی فراہمی کے انتظامات اور دیگر سہولیات کا جائزہ لیا گیا، وزیر مذہبی امور سردار محمد یوسف نے کہا کہ عازمین حج زحمت سے بچنے کے لیے پاک حج ایپ پر دیئے گئے شیڈول کے مطابق حاجی کیمپ آئیں، اسلام آباد، لاہور، پشاور، ملتان میں ویکسین کی فراہمی 21 اپریل سے شروع ہو گی۔ کراچی، رحیم یار خان، سکھر، فیصل آباد اور سیالکوٹ میں 22 اپریل سے ویکسین فراہمی کا آغاز ہو گا۔ کوئٹہ کے عازمین حج کو لازمی ویکسین لگانے کا آغاز 23 اپریل سے ہو گا۔ رحیم یار خان کا عارضی حاجی کیمپ 22 تا 24 اپریل کام کرے گا، عازمین کرام متعلقہ حاجی کیمپوں میں لازمی ویکسین، ادویات کی پیکنگ اور حج تحائف وصول کریں گے، پرواز سے دو دن قبل  متعلقہ حاجی کیمپ سے ٹکٹ، ویزہ، شناختی لاکٹ، سٹیکرز اور موبائل سم حاصل کرنا ہو گی۔