اسلام آباد(خبرنگار)پارلیمانی سیکرٹری وزارت تعلیم و پیشہ وارانہ تربیت فرح ناز اکبر کی زیر صدارت ملک میں ٹیکنالوجی، تعلیم اور صحت کے شعبوں کو ترقی دینے کیلئے جائزہ اجلاس منعقد ہوا۔ جمعہ کو جاری پریس ریلیز کے مطابق منعقدہ اجلاس میں پاکستان کے ٹیکنالوجی کے شعبے کو آگے بڑھانے کے ساتھ ساتھ تعلیم اور صحت کی دیکھ بھال کے نظام کو اندرون و بیرون ملک مضبوط اور فعال بنانے کی مربوط حکمت عملیوں پر غور کیا گیااجلاس میں ڈاکٹر اشفاق احمد نے پرائمری اسکول سے لے کر یونیورسٹی کی سطح تک کے طلبا کے لئے مصنوعی ذہانت کا ایک جامع نصاب تیار کرنے کے لئے ایک وژنری تجویز پیش کی۔ وفاقی تعلیم کی وزارت کے تحت نافذ کئے جانے والے اس اقدام کا مقصد پاکستانی طلبا کو ٹیکنالوجی سے چلنے والی بڑھتی ہوئی دنیا کے تقاضوں کو پورا کرنے کے لئے ضروری مصنوعی ذہانت کی مہارتوں سے آراستہ کرنا ہے۔شمشاد احمد خان نے مشاورتی خدمات کی شکل میں اپنی مہارت پیش کی جس کا مقصد کویت میں تعلیم اور صحت کی دیکھ بھال کے شعبوں کو بڑھانا ہے ان کی شمولیت ترقیاتی اہداف کے حصول میں بین الاقوامی تعاون کی اہمیت کو اجاگر کرتی ہے۔اجلاس میں دو بنیادی مقاصد نوجوانوں میں AI کی مہارت کو فروغ دے کر تکنیکی ترقی کو فروغ دینا اور تعلیمی نظام کو بہتر بنانا تاکہ طلبا کو مستقبل کے چیلنجوں کے لئے بہتر طریقے سے تیار کیا جا سکے،پر زور دیا گیا۔ شرکا نے پاکستان کے لئے پائیدار ترقی کو آگے بڑھانے میں جدت، تعاون اور طویل مدتی منصوبہ بندی کی اہمیت پر زور دیا