راولپنڈی(جنرل رپورٹر)گورنر پنجاب سردار سلیم حیدر خان نے کہا کہ ڈسٹرکٹ بار راولپنڈی نے عزت افزائی کی جس پر انکا شکر گزار ہوں،ڈسٹرکٹ بار راولپنڈی نے میرا مشکل وقت میں ساتھ دیا۔ 2008 کا الیکشن مشکل الیکشن تھا مگر ڈسٹرکٹ بار راولپنڈی کے متحرک کردارکی وجہ سے کامیابی حاصل ہوئی۔ مشکل صورتحال میں نظریہ مقدم رکھنا ہی سیاست ہے۔ راولپنڈی میں پلا بڑھا ہوں، ڈسٹرکٹ بار سے ہمیشہ قریبی تعلق رہا، ان خیالات کا اظہار انہوں نے گزشتہ روز ڈسٹرکٹ بار ایسوسی ایشن راولپنڈی اور پیپلز لائرز فورم کے زیرِ اہتمام منعقد ہونے والی  تقریب سے خطاب کرتے ہو ئے کیا،  پیپلز لائرز فورم ڈویژن،ہائی کورٹ و ڈسٹرکٹ کے تمام عہدیدار موجود تھے، سردار منظر بشیر ایڈووکیٹ صدر، ملک اسد ایڈووکیٹ جنرل سیکرٹری ڈسٹرکٹ بار ایسوسی ایشن راولپنڈی، پیپلز لائرز فورم کے ڈویژنل صدر سید مسعود الحسن شاہ ایڈووکیٹ، ساجد خان تنولی ایڈووکیٹ جنرل سیکرٹری سینٹرل پنجاب، شاہد محمود مغل ایڈووکیٹ،ممبر پاکستان بار کونسل سید قلب حسن شاہ ایڈووکیٹ و ممبران پنجاب بار کونسل بشارت اللہ خان ایڈووکیٹ،اسد عباسی،چوہدری آصف لکھن اور دیگر وکلا بھی موجود تھے،گورنر پنجاب سردار سلیم حیدر خان نے بار ایسوسی ایشن راولپنڈی و پیپلز لائرز فورم کا شکریہ ادا کیااور کہا کہ قانون کی بالادستی کے لیے وکلا نے تاریخی جہدوجہد کی ہے۔ ڈسٹرکٹ بار راولپنڈی میں وکلا کے بھائی چارے کا مظاہرہ مثالی ہے۔ پیپلز پارٹی کارکنوں کی جماعت ہے، بحثیت کارکن  پی پی قیادت نے گورنر بنایا۔ پی پی نے ہی رکشہ، سائیکل چلانے والے اور جھگی میں رہنے والوں کو سینٹر بنایا۔ پی پی نے کارکن راجہ پرویز اشرف کو وزیر اعظم بنایا۔ مجھے گورنر بنایا، پی پی ہمیشہ سیاسی کارکنوں کو اہمیت دیتی ہے۔ انہوں نے کہا کہ حقیقی جمہوریت صرف وکلا میں ہے، ہر سال الیکشن ہوتے ہیں۔ بلا تفریق گورنر ہاس کے دروازے سب کے لیے کھلے ہیں۔ ہر الیکشن میں دھاندلی کا شور اٹھتا ہے،  ہارنے والا احتجاج کرنا شروع کر دیتا ہے جس سے حکومتی کارکردگی متاثر ہوتی ہے۔ نظام کو چلانے کے لیے ایسے اقدامات کی ضرورت ہے کہ کوئی نظام پر انگلی نہ اٹھائے۔