لاہور(سپورٹس رپورٹر)پاکستان سپر لیگ کے 10ویں ایڈیشن کے بقیہ میچز کے ٹکٹوں کی فروخت کادوبارہ آغا ہوگیا۔پاکستان کرکٹ بورڈ نے  17 سے 25 مئی تک راولپنڈی اور لاہور میں کھیلے جانے والے پی ایس ایل کے بقیہ آٹھ میچز کے ٹکٹوں کی تفصیلات کا اعلان کر دیا۔ پی ایس ایل 10 کے بقیہ میچز کا آغاز 17 مئی سے ہوگا جبکہ ایونٹ کا فائنل 25 مئی کو لاہور کے تاریخی قذافی سٹیڈیم میں کھیلا جائیگا۔پی سی بی کے اعلامیہ کے مطابق لیگ میچز اور پلے آف کے ٹکٹ pcb.tcs.com.pk اور نامزد ٹی سی ایس ایکسپریس مراکز سے بھی خریدے جا سکتے ہیں۔ فزیکل ٹکٹوں کو ٹی سی ایس کے نامزد ایکسپریس مراکز پر ذاتی طور پر واپس کرنے کی ضرورت ہوگی۔ رقم کی واپسی کی تاریخ کا اعلان مناسب وقت پر کیا جائیگا۔ ذرائع کا کہنا ہے کہ پاکستان‘ بھارت کشیدہ حالات کے بعد پاکستان سپر لیگ کے دوبارہ آغاز پر زیادہ شائقین کی آمد متوقع ہے۔ وہ شائقین جنہوں نے 8 مئی کو پشاور زلمی بمقابلہ کراچی کنگز، 9 مئی پشاور زلمی بمقابلہ لاہور قلندرز اور 10 مئی کو اسلام آباد یونائیٹڈ بمقابلہ کراچی کنگز کے میچز کے ٹکٹ خریدے تھے اب وہ انہی ٹکٹوں کو بالترتیب 17، 18 اور 19 مئی کے میچز کیلئے استعمال کرسکتے ہیں۔راولپنڈی سٹیڈیم میں 18 مئی کو ڈبل ہیڈر ڈے ہونے کی وجہ سے دونوں میچوں میں شرکت کیلئے 9 مئی کا ٹکٹ استعمال کیا جا سکتا ہے۔جن شائقین نے ایلیمینیٹر 1، 2 اور فائنل کے ٹکٹ خریدے ہیں وہ متعلقہ میچوں کی نئی اعلان کردہ تاریخوں کے مطابق انہیں استعمال کر سکتے ہیں۔شائقین5 اور 10 مئی کو ملتان میں ہونے والے مقابلوں اور راولپنڈی میں پہلے کے شیڈولڈ کوالیفائر کا مکمل ریفنڈ حاصل کر سکتے ہیں۔ آن لائن اور کارپوریٹ ریفنڈ بکنگ کے وقت استعمال کیے گئے اکاؤنٹس میں منتقل کیے جائیں گے۔ انگلینڈ کرکٹ ٹیم کے جارحانہ بیٹر ایلکس ہیلز اسلام آباد یونائیٹڈ کا دوبارہ حصہ بن گئے۔ ایلکس ہیلز نے کہا ہے کہ اسلام آباد یونائیٹڈز میرے دل کے بہت قریب ہے۔ اسلام آباد یونائیٹڈ پی ایس ایل میں میری پہلی ٹیم تھی جس کیلئے میں نے پاکستان میں کھیلا۔ اسلام آباد یونائیٹڈ کے شائقین اور مینجمنٹ نے ہمیشہ مجھے سپورٹ کیا، ٹیم جوائن کرنے کیلئے بے تاب ہوں۔جنوبی افریقہ کے کرکٹر رسی وین ڈر ڈوسن پی ایس ایل 10 کے بقیہ میچز میں شرکت کریں گے۔ اسلام آباد یونائیٹڈ کو دستیابی ظاہر کر دی،وہ اس سے قبل ذاتی وجوہات کی وجہ سے لیگ سے دستبردار ہوئے تھے۔ ذرائع کا کہنا ہے کہ پشاور زلمی کے لیوک ووڈ، مکس برینٹ اور نجیب زادران کی بقیہ میچز میں شرکت متوقع ہے۔