اسلام آباد(اپنے سٹاف رپورٹر سے)جناح سکوائر مری روڈ انڈر پاس پراجیکٹ کی دونوں اطراف کی دیواریں مکمل کر لی گئی ہیں جبکہ چھت کے کام  کا آغاز ہو چکا ہے۔وفاقی وزیر داخلہ محسن نقوی نے جناح سکوائر مری روڈ انڈر پاس پراجیکٹ کا دورہ کیا اور ترقیاتی کام پر ہونے والے پیشرفت کا جائزہ لیا۔ 22 مئی کو جناح سکوائر مری روڈ انڈر پاس کا افتتاح کیا جائے گا۔ وزیر داخلہ محسن نقوی نے پراجیکٹ پر جاری تعمیراتی سرگرمیوں کا معائنہ کرتے ہوئے رواں ماہ کے دوران 100 فیصد کام مکمل کرنے کی ہدایت کی۔ انہوں نے بارشوں کے باوجود ترقیاتی کام کی رفتار اور معیار پر اطمینان کا اظہار کیا۔ وزیرداخلہ نے پراجیکٹ کے اطراف  گرین ایریاز اور بہترین لینڈسکپینگ کرنے کی ہدایت کی۔ انہوں نے انڈر پاس کے قریب زیر تعمیر پل کا بھی معائنہ کیا۔وزیر داخلہ محسن نقوی نے ایکسپریس وے پر تجاوزات کے خاتمے کے لیے بھی فوری کارروائی کا حکم دیا۔ انہوں نے کہا کہ اسلام آباد کو  ٹریفک نظام اور سہولتوں کے حوالے سے عالمی معیار کا شہر بنانا پہلی ترجیح ہے۔ چیئرمین سی ڈی اے محمد علی رندھاوا نے پراجیکٹ کے حوالے سے بریفننگ دیتے ہوئے کہا کہ منصوبے پر ترقیاتی کام 75 فی صد تک مکمل کیا جا چکا ہے، پراجیکٹ کی چار میں سے تین سلپ سڑکیں مکمل ہیں اور عوام کے سہولت کیلئے ٹریفک بحال کر دی گئی ہے۔ بریفننگ میں مزید بتایا گیا کہ بارشوں اور موسمی حالات کے باوجود ترقیاتی کام مقررہ وقت پر مکمل کیا جائے گا۔وفاقی سیکرٹری داخلہ محمد خرم آغا، ڈپٹی کمشنر اسلام آبادعرفان میمن اور دیگر افسران بھی اس موقع پر موجود تھے۔