اسلام آباد‘نئی دہلی(این این آئی) پاکستان کی جانب سے آپریشن بنیان مرصوص (آہنی دیوار) کے تحت جوابی کارروائیوں نے نہ صرف بھارت کی عسکری صلاحیتوں کو چیلنج کیا بلکہ اب بھارتی معیشت کو بھی شدید دھچکا پہنچا ہے۔ بین الاقوامی خبر رساں ادارے کے مطابق جنگی جنون میں مبتلا بھارتی حکومت کو سٹاک مارکیٹ میں اب تک 83 بلین ڈالرز کا نقصان ہو چکا ۔رپورٹ میں بتایا گیا ہے کہ بھارتی سٹاک مارکیٹ میں شدید بے چینی کی فضا ہے‘ اور غیرملکی سرمایہ کاروں نے واضح طور پر تحفظات کا اظہار کیا ہے۔ جمعرات کے روز مارکیٹ کے انڈیکسز میں تقریباً 0.5 فیصد کی کمی ہوئی، جبکہ پورے ہفتے کے دوران مارکیٹ میں 1.3 فیصد کی تنزلی ریکارڈ کی گئی۔سٹاک مارکیٹ کے 13 بڑے شعبوں میں سے 12 شعبے شدید مندی کا شکار ہو چکے ہیں۔