اسلام آباد (نوائے وقت رپورٹ) ملک کے دو بڑے ڈیم تربیلا اور منگلا ڈیڈ لیول کے نزدیک پہنچ گئے۔ 3 تا 4 روز  میں اس لیول پر جا سکتے ہیں۔ انڈس ریور سسٹم اتھارٹی (ارسا) نے تربیلا اور منگلا ڈیم کے ڈیڈ لیول صورتحال سے صوبوں کو خبردار کر دیا۔ ارسا نے اپنے مراسلے میں پانی تقسیم کا نیا ضابطہ جاری کر دیا اور کہاکہ ربیع سیزن کے باقی عرصے کیلئے پانی کی 30 سے 35 فیصد قلت کا خدشہ ہے۔ صوبائی محکمہ آبپاشی کو فوری اقدامات لینے کی ہدایات جاری کر دی گئیں۔ مراسلے میں کہا گیا ہے کہ بارش کے نہ ہونے تک صورتحال بہتر ہونے کا امکان نہیں۔ رواں ربیع سیزن میں پنجاب نے 20 فیصد پانی کی قلت برداشت کی۔ سندھ نے رواں ربیع سیزن میں 16 فیصد پانی کی قلت برداشت کی۔ ارسا سندھ کو 27ہزار کیوسک طلب کے مقابلے میں 25 ہزار کیوسک پانی فراہم کیا جا رہا ہے۔ پنجاب کو 40 ہزار کیوسک پانی فراہم کیا جا رہا ہے اور طلب 45 ہزار کیوسک ہے۔