لاہور(سپورٹس رپورٹر)پاکستان سپر لیگ (پی ایس ایل) کی مقبول ترین فرنچائزز لاہور قلندرز نے ماحولیاتی پائیداری اور جنگلی حیات کے تحفظ کو فروغ دینے کیلئے وائلڈ لائف ڈیپارٹمنٹ پنجاب کے ساتھ شراکت داری قائم کی ہے۔ یہ اشتراک کرکٹ کے میدان سے ہٹ کر سماجی ذمے داری نبھانے کے عزم کی جانب ایک اہم قدم ہے۔ اس مہم کے تحت، لاہور قلندرز اور وائلڈ لائف ڈیپارٹمنٹ پنجاب مل کر عوام میں قدرتی ماحول کے تحفظ، نایاب نسلوں کی بقاء اور صوبے بھر میں جنگلی حیات کے تحفظ کی کوششوں کے بارے میں آگاہی پیدا کریں گے۔ اس حوالے سے گفتگو کرتے ہوئے لاہور قلندرز کے سی ای او عاطف رانا نے کہاہم سمجھتے ہیں کہ کھیل صرف تفریح نہیں، بلکہ تبدیلی کا ایک مؤثر ذریعہ بھی ہیں۔ یہ شراکت داری ہمارے ماحول کیلئے ایک مثبت قدم ہے۔