اسلام اباد (نمائندہ خصوصی) وزیراعظم کے خصوصی معاون ہارون اختر خان اور پاکستان آٹوموٹو مینوفیکچررز ایسوسی ایشن  کے نمائندوں کے درمیان ایک اعلی سطحی اجلاس منعقد ہوا۔ اس ملاقات میں ہونڈا، ٹویوٹا، سوزوکی، کیا، ہیوندای، یوتونگ، اور سازگار سمیت دیگر اہم آٹوموٹو مینوفیکچررز نے شرکت کی۔ اجلاس کے دوران آٹوموٹو سیکٹر سے متعلق مختلف اہم مسائل پر بات چیت کی گئی، جن میں ٹیرف ریٹس، آئندہ بجٹ، ریگولیٹری ڈیوٹیز، اور طویل مدتی پالیسیوں پر تفصیل سے گفتگو کی گئی۔ہارون اختر خان نے اجلاس میں شرکت کرنے والوں سے خطاب کرتے ہوئے حکومت کے مقامی مینوفیکچررز کی حمایت کے عزم کا اعادہ کیا اور آٹوموٹو سیکٹر کو فروغ دینے کی اہمیت پر زور دیا۔ انہوں نے مزید کہا کہ وزیراعظم کا وژن برقی گاڑیوں کے فروغ کے لیے مراعات فراہم کرنے پر مرکوز ہے۔ ہارون اختر خان نے آٹوموٹو مینوفیکچررز کو یقین دلایا کہ اس سیکٹر کے فروغ کے لیے ہر ممکن قدم اٹھایا جائے گا تاکہ اس کی ترقی کو یقینی بنایا جا سکے۔ انہوں نے یہ بھی کہا کہ وزیراعظم کا وڑن طویل مدتی پائیداری اور ترقی کے لیے ہے اور اس بات کو یقینی بنایا جائے گا کہ آٹوموٹو مینوفیکچررز کو درپیش تمام چیلنجز جلد حل ہو جائیں گے۔