اسلام آباد (نوائے وقت رپورٹ+نمائندہ خصوصی) وفاقی وزیر منصوبہ بندی احسن اقبال نے کہا ہے کہ آج بھارت پوری دنیا میں مذاق بن گیا ہے۔ پاکستان کی حکومت اور مسلح افواج چوکس ہیں۔ نارووال میں پیس ڈائیلاگ امن کانفرنس سے خطاب میں احسن اقبال نے کہا کہ آج بھارت نے جو ہندوتوا کی نفرت پیدا کی وہ اس آگ میں خود جل رہا ہے۔ ایک عام نوجوان میں سوشل میڈیا کے ذریعے نفرت کے بیج بوئے گئے۔ اس نوجوان کے پستول سے نکلنے والی گولی اب بھی میرے جسم میں موجود ہے۔ سوشل میڈیا ایک ایسا ذریعہ ہے جس کی وجہ سے لوگ اس سے متاثر ہو رہے ہیں۔ 2018ء کے الیکشن کے وقت ہمارے خلاف نفرت پھیلائی گئی۔ وزیراعظم شہباز شریف کی قیادت میں حکومت  دن رات کام کر رہی ہے۔ ہم نے پاکستان کے معاشرے کو ایک نفرت سے پاک ملک بنانا ہے۔