اسلام آباد (خبرنگار خصوصی) پاکستان نیوی کوسٹل کمانڈ کی سالانہ ایفیشنسی کمپیٹیشن پریڈ پی این ایس قاسم میں منعقد ہوئی۔ ترجمان پاک بحریہ کے مطابق امیر البحر ایڈمرل نوید اشرف نے تقریب میں بطور مہمان خصوصی شرکت کی۔  چیف آف دی نیول سٹاف نے اپنے خطاب میں اس بات پر زور دیا کہ کوسٹل کمانڈ نے اندرونی اور بیرونی سکیورٹی کے چیلنجز کے باوجود سر کریک سے جیوانی تک پاکستان کے ساحلی علاقوں کی حفاظت کرتے ہوئے اپنے مشن میں بہترین کارکردگی کا مظاہرہ کیا ہے۔ قبل ازیں اپنے خطبہ استقبالیہ میں کمانڈر کوسٹ نے کوسٹل کمانڈ کی آپریشنل کامیابیوں پر روشنی ڈالی اور پریڈ کے دوران کی جانے والی سرگرمیوں کا مختصر جائزہ پیش کیا۔ تقریب کے دوران مہمان خصوصی نے پاکستان نیوی کوسٹل کمانڈ کی بہترین کارکردگی کا مظاہرہ کرنے والے یونٹس کو ایوارڈز اور ٹرافیاں پیش کیں۔ کیڈٹ کالج سانگھڑ (سی سی ایس) میں  یوم والدین کی تقریب منعقد ہوئی جس میں پاک بحریہ کے سربراہ ایڈمرل نوید اشرف نے بطور مہمان خصوصی شرکت کی۔  ترجمان پاک بحریہ کے مطابق مہمان خصوصی کی آمد پر کیڈٹس کے چاق و چوبند دستے نے سلامی اور گارڈ آف آنر پیش کیا۔ تقریب سے خطاب کرتے ہوئے نیول چیف نے کیڈٹس کو بہترین تربیتی سہولیات فراہم کرنے اور بورڈ کے سالانہ نتائج میں کیڈٹس کی جانب سے نمایاں پوزیشن حاصل کرنے پر فیکلٹی اور انتظامیہ کی کاوشوں کی تعریف کی۔ انہوں نے ادارے کی ترقی اور فلاح کے لیے حکومت سندھ کی مسلسل معاونت کو سراہا۔ مہمان خصوصی نے کیڈٹ کالج سانگھڑ میں اعلی تعلیمی معیار اور کردار سازی کو یقینی بنانے کے لیے ہیڈکوارٹر کمکار کی کوششوں کی بھی تعریف کی۔قبل ازیں، کیڈٹ کالج سانگھڑ کے پرنسپل کموڈور ذیشان علی نے سالانہ رپورٹ پیش کی اور تعلیمی، کھیلوں اور ہم نصابی سرگرمیوں میں کیڈٹس کی غیر معمولی کارکردگی پر روشنی ڈالی۔ بعد ازاں، مہمان خصوصی نے سال  میں شاندار کارکردگی کا مظاہرہ کرنے والوں میں انعامات تقسیم کیے۔ سابق کیڈٹ فہیم احمد اور سابق کیڈٹ صاحب خان نے بالترتیب سٹک آف آنر اور بیج آف آنر کے اعلی ترین انعامات حاصل کیے۔ سابق کیڈٹ جنید بابر نے بہترین تعلیمی کارکردگی پر قائداعظم میڈل حاصل کیا۔ جبکہ کیڈٹ محمد عزیز کو بہترین سپورٹس مین کا ایوارڈ اور کیڈٹ محمد علی کو سال کا بہترین ڈیبیٹر قرار دیا گیا۔ مہمان خصوصی نے کیڈٹس کی طرف سے پیش کی گئی سائنس، آرٹس اور ثقافتی نمائش کا بھی مشاہدہ کیا۔