قومی ٹیم کے سابق کپتان شاہد آفریدی نے بھارت کی گیدڑ بھپکیوں پر رد عمل دیتے ہوئے کہا کہ یہ کس کو ڈرانے کی کوشش کررہے ہیں.ہم تو ایسے ہی حالت جنگ میں ہیں اور ہماری فوج اتنی تربیت یافتہ ہوچکی ہے کہ یہ ہمارا مقابلہ بھی نہیں کرپائیں گے۔بوم بوم آفریدی نے پہلگام فالس فلیگ آپریشن کے بعد مودی سرکار اور بھارتی فوج کو آڑے ہاتھوں لیا تو بھارتی میڈیا سے یہ ہضم نہ ہوا اور آفریدی کو بغیر وردی کے فوجی کہنا شروع کردیا۔پاکستان کرکٹ ٹیم کے سابق کپتان نے نجی ٹی وی پروگرام میں شرکت کی، جہاں میزبان کی جانب سے کہا گیا کہ بھارتی میڈیا اور شیکھر دھون سمیت دیگر کرکٹرز کہہ رہے ہیں کہ شاہد آفریدی بغیر وردی کے فوجی ہے، اس پر آپ کیا کہیں گے؟شاہد آفریدی نے جواب دیا کہ اس ملک کی حفاظت کے لیے تو بغیر وردی کے 25 کروڑ عوام فوجی ہے اور ملک ہمارا گھر ہے ہے، ہم کس طرح کسی کو بغیر اجازت کے اپنے گھر میں آنے دیں گے، ہاں آپ عزت سے آجاؤ، عزت بھی دیں گے، پیار بھی دیں گے لیکن آپ بدمعاشی کروگے اور اس خطے میں اپنے آپ کو برتر سمجھوگے تو یہ آپ کی غلط فہمی ہے۔ان کا کہنا تھا کہ آپ ترقی کر رہے ہیں یہ اچھی بات ہے کہ آپ کے لوگ آگے بڑھ رہے ہیں اور ہمیں اس بات کی خوشی ہے لیکن دوسرا کوئی آگے بڑھنا چاہ رہا ہے، اس کی ٹانگ کھینچنا، اس ملک کے حالات خراب کرنا کیا یہ آپ لوگوں کو زیب دیتا ہے۔مزید کہا ’کیا پڑھی لکھی قوم ایسے کرتی ہیں‘، پڑوسی آپس میں ایک دوسرے کا خیال رکھتے ہیں، میرے خیال میں یہ ان کی غلط فہمی ہے، میرے پاس یہ ملک ہے جس کے لیے میرے بڑوں نے بہت قربانیاں دی ہیں۔سوال کے جواب میں ان کا کہنا تھا کہ میں بھارت سے کچھ کماتا نہیں ہوں، نہ میرا کوئی ایسا یوٹیوب چینل ہے، تو مجھے تو ان چیزوں کا مسئلہ نہیں ہے، رزق دینے والی ذات اللہ کی ہے۔الحمدللہ میرے پاس یہ ملک ہے اور اس کی خاطر میں کچھ بھی کر سکتا ہوں، اس ملک نے مجھے بہت کچھ دیا ہے لہذا میرے لی. میرے خاندان اور 25 کروڑ عوام کے لیے اس ملک سے بڑھ کے کوئی اور چیز نہیں ہے۔میزبان نے کہا کہ بھارتی عوام مطالبہ کررہی ہے کہ آفریدی کا چینل بھی بند کردو، جس کے جواب میں انہوں نے کہا کہ کردو بند، مجھے تو کوئی مسئلہ نہیں، میں کون سا پروفیشنل طریقے سے یا پیسوں کی کمائی کے لیے یوٹیوب چلا رہا ہوں، میں بس اپنی فیملی یا فاؤنڈیشن کی چیزوں کو زیادہ شیئر کرتا ہوں۔شاہد آفریدی کا کہنا تھا کہ بھارتی جو ہمیں ڈرانے کی کوشش کر رہے ہیں. ہم تو حالت جنگ میں کافی عرصے سے ہیں.ہماری فوج تو اتنی ٹرینڈ ہو گئی ہے کہ وہ تو یہ تو ہمارا مقابلہ ہی نہیں کر پائیں گے۔انہوں نے کہا کہ دہشت گردی کو کون سپورٹ کرتا ہے، نہ کوئی ملک کرتا ہے نہ کوئی مذہب کرتا ہے، اس جنگ میں ہمارے 80 سے 90 ہزار لوگ شہید ہوئے ہیں، ہمارا تو مذہب دہشت گردی کے خلاف ہے. دین اسلام امن کی بات کرتا ہے، ہم تو امن پسند لوگ ہیں۔ان کا کہنا تھا کہ میں دنیا میں بہت گھومتا ہوں، یقین کریں ہر جگہ بھارتی بہت پیار سے ملتے ہیں، امریکا اور انگلینڈ سمیت دیگر ممالک میں پڑھا لکھا بھاری طبقے سے جب بھی بات ہوتی ہے تو ان میں سے کوئی بھی مودی کی تعریف نہیں کرتا، سب کہتے ہیں ہم اس سے تنگ ہیں۔قومی ٹیم کے سابق کپتان نے کہا کہ ہمارے کس گھر کے اندر بھارتی گانے یا فلمیں نہیں چلتیں، ہم آپ لوگوں کے اسٹارز کو اہمیت دیتے ہیں ان کی عزت کرتے ہیں اور اسی طرح آپ لوگ بھی ہمارے اسٹارز کی قدر کرتے ہیں، میں ہمیشہ کہتا ہوں مجھے بھارت میں بہت عزت ملتی ہے۔ان کا مزید کہنا تھا کہ سب کچھ اپنی جگہ لیکن بدمعاشی نہیں چلے گی، بدمعاشی نہ کرو، آپ ترقی کر رہے ہو، دنیا میں آگے بڑھ رہے ہو، بہت اچھی بات ہے، خوشی کی بات ہے لیکن ہمارے راستے نہ روکو، ہمارے لیے رکاوٹیں نہ کھڑی کرو۔
واضح رہے کہ شاہد آفریدی نے پہلگام واقعے کو ڈرامہ قرار دیتے ہوئے کہا تھا کہ بھارت میں پٹاخا بھی پھٹ جائے تو الزام پاکستان پر دھردیا جاتا ہے۔ان کا کہنا تھا کہ پہلگام واقعے پر نظر ڈالیں تو صرف ڈرامہ نظر آتا ہے، تم لوگوں کی 8 لاکھ فوج مقبوضہ کشمیر میں بیٹھی ہے اور یہ واقعہ ہوگیا. اس کا مطلب یہ ہوا کہ نالائق اور نکمے ہیں جو اپنے لوگوں کو سیکیورٹی نہیں دے سکے۔
بعد ازاں شاہد آفریدی پاک فوج کی وردی کی طرح شرٹ پہن کر واہگہ بارڈر پہنچے جو بھارتی میڈیا سے ہضم نہ ہوا۔بھارتی کرکٹر شیکھر دھون نے ’ایکس‘ پر آفریدی کو کہا ’کارگل میں بھی ہرایا تھا، بلاوجہ کمنٹس کرنے سے بہتر ہے اپنے ملک کی ترقی میں دماغ لگاو‘۔شاہد آفریدی نے انہیں جواب دیا ’چھوڑو جیت ہار کو، آو تمہیں چائے پلاتا ہوں، شیکھر‘۔
