کراچی (اسٹاف رپورٹر) وزیر اعلیٰ سندھ سید مراد علی شاہ نے عالمی یوم تھیلیسیمیا کے موقع پر اس موروثی اور جان لیوا بیماری سے متعلق آگاہی بڑھانے کی فوری ضرورت پر زور دیا ہے۔اپنے پیغام میں انہوں نے کہا کہ تھیلیسیمیا صرف مریض کے لیے نہیں بلکہ پورے خاندان کے لیے ایک چیلنج ہے۔ عوام سے اپیل ہے کہ تھیلیسیمیا کے مریضوں کی زندگی بچانے کے لیے خون کا عطیہ دیں اور اس بیماری سے بچاؤ کے لیے آگاہی کو فروغ دیں۔انہوں نے مزید کہا کہ نئی نسل کو تھیلیسیمیا سے بچانا سندھ حکومت کی اولین ترجیح ہے۔ اس موقع پر انہوں نے صحت کے شعبے میں جامع اصلاحات کے عزم کا اعادہ بھی کیا۔مراد علی شاہ نے بتایا کہ صوبے بھر میں تھیلیسیمیا کے علاج کے لیے جدید طبی سہولیات فراہم کی جا رہی ہیں۔ وزیر اعلیٰ نے زور دیا کہ تعلیمی اداروں، میڈیا پلیٹ فارمز اور کمیونٹی پروگراموں میں آگاہی مہمات جاری ہیں۔ انہوں نے کہا کہ تھیلیسیمیا کی روک تھام کے لیے مزید مؤثر اقدامات کی ضرورت ہے اور تجویز دی کہ ایک جامع اسکریننگ پروگرام کے آغاز سے اس بیماری کے پھیلاؤ میں نمایاں کمی لائی جا سکتی ہے۔مراد علی شاہ  نے تھیلیسیمیا سے نمٹنے میں والدین، اساتذہ اور مذہبی رہنماں کے کلیدی کردار کو بھی اجاگر کیا اور اعلان کیا کہ صوبے بھر میں عوامی آگاہی مہمات کو مزید تیز کیا جائے گا۔دریں اثناء وزیر اعلیٰ سندھ سید مراد علی شاہ نے لیاری کی 19 سالہ باکسنگ چیمپئن عالیہ سومرو سے ملاقات کی، انہیں 10 لاکھ روپے نقد انعام دیا اور حکومت کی جانب سے ہر ممکن تعاون کی پیشکش کی جس میں ضرورت پڑنے پر پیشہ ور کوچ فراہم کرنے کی سہولت بھی شامل ہے۔یہ ملاقات وزیراعلیٰ ہاؤس میں ہوئی جس میں صوبائی وزیر علی حسن زرداری، میئر کراچی مرتضی وہاب، پرنسپل سیکریٹری آغا واصف اور ارکان صوبائی اسمبلی شازیہ کریم اور محمد یوسف نے شرکت کی۔عالیہ سومرو نے حال ہی میں تاریخ رقم کرتے ہوئے عالمی باکسنگ ٹائٹل جیتنے والی پہلی پاکستانی خاتون ہونے کا اعزاز حاصل کیا۔ اس وقت وہ تھائی لینڈ میں تربیت حاصل کر رہی ہیں اور دو ماہ بعد دبئی میں ایک بھارتی باکسر کے خلاف مقابلہ کریں گی۔وزیر اعلیٰ مراد علی شاہ نے عالیہ کی اس کامیابی کو سراہتے ہوئے انہیں ایشین گیمز کی تیاری شروع کرنے کی ہدایت دی اور مکمل تعاون کا یقین دلایا۔ انہوں نے کہا کہ محنت کرو؛ سندھ حکومت تمہارے ساتھ ہے۔