اسلام آباد (اپنے سٹاف رپورٹر سے) آئی پی ایس او ایس کے تازہ ترین کنزیومر کنفیڈنس سروے 2025ء نے پاکستان کی معاشی سمت کو درست قرار دیدیا۔ ملک کی اقتصادی سمت کے بارے میں عوام کے پرامید ہونے کی شرح 6 سال کی بلند ترین سطح پر پہنچ گئی ہے۔ سروے رپورٹ کے مطابق پاکستان میں 31 فیصد عوام کا اعتماد ہے کہ ملک صحیح سمت پر گامزن ہے۔ پراعتمادی کی یہ شرح اگست 2024ء  میں 11 فیصد جبکہ ستمبر 2023ء  میں سب سے کم 2 فیصد تھی۔ گلگت بلتستان اور آزاد کشمیر سمیت چاروں صوبوں کے ساتھ ساتھ شہری اور دیہی علاقوں میں معاشی بہتری دیکھی گئی ہے۔ افراط زر کی شرح میں 18 فیصدکی کمی ہوئی جو4 سالوں میں سب سے کم ہے۔ ملکی معیشت کو مضبوط قرار دیئے جانے کی شرح میں 500فیصد اضافہ دیکھا گیا۔ سروے رپورٹ کے مطابق ’’ہر پانچ میں سے ایک پاکستانی اگلے 6 ماہ میں بہتری کی توقع کر رہا ہے، جو مئی 2024 کے بعد سب سے زیادہ ہے‘‘۔ ملازمت، سکیورٹی کے حوالے سے اعتماد میں 19 فیصد اضافہ ہوا۔ پاکستان کی عالمی کنزیومر کنفیڈنس انڈیکس میں مثبت تبدیلی کے ساتھ 2.7 پوائنٹس کا اضافہ ہوا۔