لاہور(نامہ نگار)پنجاب پولیس کے 137 سب انسپکٹرز کو انسپکٹر کے عہدے پر ترقی دیدی گئی ہے۔انسپکٹر کے عہدے پر ترقی پانے والوں میں لاہور کے40،راولپنڈی کے 30،ملتان کے 21، بہاولپور کے9، گجرات کے7، گوجرانوالہ کے 9، فیصل آباد کے7،ساہیوال کے 5، ڈی جی خان کے4،شیخوپورہ کے2 اورسرگودھا کے 2 سب انسپکٹر شامل ہیں۔ انسپکٹر جنرل پولیس پنجاب ڈاکٹر عثمان انور کی ہدایت پر پنجاب پولیس میں افسران و اہلکاروں کی پروموشن کا عمل تیزی سے جاری ہے۔ ایڈیشنل آئی جی پنجاب سلطان احمد چوہدری کی زیر صدارت پروموشن بورڈ کا اجلاس سنٹرل پولیس آفس میں منعقد ہوا۔ میرٹ، قواعد و ضوابط پر پورا اترنے والے137 سب انسپکٹرز کوانسپکٹر کے عہدے پر ترقی دی گئی۔سب انسپکٹرز کو انسپکٹر کے عہدہ پر ترقی تین سالہ پروبیشن پیریڈ کے تحت دی گئی ہے۔آئی جی پنجاب نے انسپکٹر کے عہدے پر ترقی پانے والے افسران کو مبارکباد دی اور مستقبل کیلئے نیک خواہشات کا اظہار کیا۔ آئی جی پنجاب نے افسران کو ہدایت دیتے ہوئے کہا کہ پاکستانیوں کی بے لوث خدمت اور پاکستان کی بے خوف حفاظت کریں۔