لاہور (خبرنگار) لاہور ہائیکورٹ نے بیرون ملک بھجوانے کا جھانسہ دیکر پیسے بٹورنے والی خاتون ایجنٹ کی درخواست ضمانت مسترد کر دی۔ جسٹس محمد طارق ندیم نے درخواست ضمانت پر سماعت کی تو درخواست گزار خاتون کی وکیل نے بتایا کہ بے بنیاد مقدمہ درج کیا گیا۔ مدعی کو رقم واپس کرنے کی یقین دہانی کرائی تھی اور آٹھ لاکھ روپے وصول کرنے کے باوجود بھی مدعی نے ایف آئی اے میں مقدمہ درج کرا دیا۔  ضمانت منظور کی جائے اور ایف آئی اے کو گرفتاری سے روکنے کا حکم دیا جائے۔ مدعی کے وکیل نے درخواست ضمانت کی مخالفت کی اور بتایا کہ پرتگال بھجوانے کا جھانسہ دے کر 20 لاکھ روپے وصول کیے اور رقم واپس نہیں کر رہی۔ ملزمہ کی گوجرانولہ کی ماتحت عدالت سے درخواست ضمانت خارج ہو چکی ہے۔