اسلام آباد (وقائع نگار) ضلعی انتظامیہ اسلام آباد نے وفاقی دارالحکومت میں نجی سیکورٹی کمپنیز اور گارڈز کی انسپکشن کے دوران کم از کم 37 ہزار ماہانہ تنخواہ نہ دینے پر نجی سیکورٹی کمپنی کے خلاف کارروائی کرتے ہوئے مینجر کو گرفتار کر لیا جبکہ بغیر لائسنس اسلحہ استعمال کرنے پر سکیورٹی گارڈ کو بھی گرفتار کر لیا گیا ۔ ڈپٹی کمشنر اسلام آباد عرفان نواز میمن نے اسلام آباد کی تمام سکیورٹی کمپنیز کی انسپکشن کی ہدایات جاری کی ہیں جس پر انتظامیہ نے بلیو ایریا میں نجی دفاتر کے باہر کھڑے سیکورٹی گارڈز کی انسپکشن کی اور بغیر لائسنس اسلحہ استعمال کرنے والے گارڈز کو گرفتار کر لیا گیا ، کم از کم 37 ہزار ماہانہ تنخواہ نہ دینے پر نجی سیکورٹی کمپنی کے مینجر کو بھی گرفتار کر لیا گیا ہے ۔ ڈپٹی کمشنر اسلام آباد عرفان نواز میمن نے کہا ہے کہ سیکورٹی کمپنیز تربیت یافتہ افراد کو ہی بطور گارڈ رکھیں ۔ سیکورٹی کمپنیز گارڈز کے اسلحہ لائسنس کی بروقت تجدید کروائیں اور گارڈز کی کم از کم اجرت 37 ہزار کو یقینی بنایا جائے ۔