لاہور(خصوصی نامہ نگار)جماعت اہلحدیث نے کہاپاکستان ختم کرنے کا شوشہ چھوڑنے والے مودی کے خواب چکنا چور ہو گئے۔ پاک فوج نے جنرل عاصم منیر کی قیادت میں اس کی کمر توڑدی ہم متحد اور زندہ قوم ہیں۔ یہ بات جماعت اہلحدیث کے امیر مولانا حافظ عبد الغفار روپڑی نے جماعت اہلحدیث پاکستان کی مشاورتی کونسل کے اجلاس سے خطاب کرتے ہوئے کہی۔ اس موقع پر مولانا حافظ عبد الوہاب روپڑی مولانا شکیل الرحمٰن ناصر حافظ عبد الوحید شاہد مولانا امجد اقبال گھمن قاری محمد فیاض میجر عبد المجید اول مولانا حافظ عبد الظاہر بھی موجود تھے۔ حافظ عبد الغفار روپڑی نے کہا 72 سالوں سے مقبوضہ کشمیر میں قتل عام کر کے مسلمانوں کی آبادیوں کو ہندو آبادیوں میں تبدیل کیا جا رہا ہے اس 8 لاکھ فوج نے کشمیر پر یلغار کرکے اس کو جیل میں تبدیل کردیا ہے۔ کشمیر پاکستان کی شہ رگ ہے۔ اگر ٹرمپ کشمیر پر ثالثی کرنے کی بات کرتے ہیں تو انہیں اپنا کردار ادا کر کے اس مسئلے کو حل کرنا چاہیے کیونکہ ہم اقوام متحدہ کے کردار کو دیکھ رہیں ہیں۔ اس میں منافقت کے علاوہ کچھ نہیں۔