لاہور( کامرس رپورٹر)عالمی سطح پر کاروباری مواقع فراہم کرنیوالے ادارے گلوبل ایس ایم ای بزنس ہوم ( سوئٹرز لینڈ) نے پاکستان میں اپنے اقدامات کے فروغ کیلئے پاکستان انڈسٹریل سیونگ مشینز امپورٹرز اینڈ ڈیلرز ایسوسی ایشن (پسمیڈا)کو باضابطہ آفیشل پارٹنر مقرر کر دیا۔ گلوبل ایس ایم ای بزنس ہوم ( سوئٹرز لینڈ) کی پاکستان میں نمائندہ اور ایڈ وائزر آمنہ احمد رضا نے اس سلسلہ میں باضابطہ مراسلہ جاری کر دیا ہے اور اس حوالے سے لاہور چیمبر آف کامرس اینڈ انڈسٹری کو بھی آگاہ کیا گیا ہے۔ گلوبل ایس ایم ای بزنس ہوم کی جانب سے رواں سال 3جولائی کو لاہور میںپاکستان گلوبل بزنس سمٹ2025کا انعقاد کیا جارہا ہے جس کیلئے پسمیڈا کو اس ایونٹ کی کامیابی اور متعلقہ کاروباری تنظیموں اور افراد سے رابطوں کی ذمہ داری سونپی گئی ہے۔ تنظیم کا فلیگ شپ عالمی ایونٹ گلوبل ایس ایم ای سمت3 تا 5 ستمبر 2025 ڈایوس کانگریس سینٹر سوئٹزرلینڈ میں منعقد ہو گی۔پسمیڈا کے وائس چیئرمین محمد یاسین نے کہا یہ ہماری تنظیم بلکہ پاکستان کا اعزاز ہے کہ گلوبل ایس ایم ای بزنس ہوم جیسے عالمی ادارے نے ہمیں اپنا آفیشل پارٹنر مقرر کیا ہے۔