لاہور (خبر نگار) لاہور کی انسداد دہشت گردی عدالت نے تحریک انصاف کے رہنمائوں شاہ محمود قریشی، اعجاز چوہدری، ڈاکٹر یاسمین راشد، میاں محمود الرشید، عمر سرفراز چیمہ سمیت دیگر ملزموں کے خلاف نو مئی کے پرتشدد واقعات سے متعلق مختلف سات مقدمات کا سینٹرل جیل کوٹ لکھپت میں جیل ٹرائل کے دوران پراسیکیوشن کو مزید گواہان پیش کرنے کی ہدایت جاری کر دی۔ انسداد دہشت گردی عدالت نے شادمان تھانے میں درج مقدمات، جناح ہائوس حملہ اور عسکری ٹاور حملے سمیت مجموعی طور پر7 مقدمات کی سماعت کی۔ پولیس تھانہ شادمان میں درج پولیس کی گاڑیاں جلانے، توڑ پھوڑ اور دیگر الزامات پر مبنی 4 مقدمات کی سماعت انسداد دہشت گردی عدالت کے ایڈمن جج منظر علی گل نے سماعت کی۔ عدالت نے پراسیکیوشن کی جانب سے گواہان کو پیش کیے جانے کے بعد مزید گواہوں کو طلب کرتے ہوئے کارروائی 20 مئی تک ملتوی کر دی۔ دوسری جانب، جناح ہائوس، عسکری ٹاور حملہ اور ایک دیگر دو مقدمات کی سماعت انسداد دہشت گردی عدالت کے جج ارشد جاوید نے سماعت کی، جس میں بھی عدالت نے پراسیکیوشن کو گواہان پیش کرنے کی ہدایت کرتے ہوئے مزید کارروائی 17 مئی تک ملتوی کر دی۔ دونوں سماعتوں کے دوران زیر حراست ملزمان ڈاکٹر یاسمین راشد، شاہ محمود قریشی، اعجاز چوہدری، میاں محمود الرشید، عمر سرفراز چیمہ سمیت دیگر ملزموں کو جیل میں قائم کمرہ عدالت میں پیش کیا گیا اور ان کی حاضری مکمل کروائی گئی۔ علاوہ ازیں برضمانت ملزموں نے بھی جیل میں پیش ہو کر اپنی حاضری مکمل کی۔