اسلام آباد (رپورٹ: عبدالستارچودھری) آپریشن بنیان مرصوص میں افواج پاکستان کی سائبر ٹیم بھی سرگرم عمل رہی اور پاکستانی سائبر ٹیم نے بھارتی جارحیت کا منہ توڑ جواب دیا۔ سکیورٹی ذرائع کے مطابق افواج پاکستان کی سائبر ٹیم نے بھارت کو مختلف ڈومینز جس میں پاور انفراسٹرکچر اور پیٹرولیم سیکٹر شامل ہیں، میں نقصان پہنچایا اس کے علاوہ پاکستانی سائبر ٹیم نے قومی مواصلات کو بھی شدید نقصان پہنچایا، جبکہ بھارتی  سرکاری ای میل اور OTP انفراسٹرکچر کو بھی بند کردیا۔ ذرائع کے مطابق پاکستانی سائبر ٹیم نے بھارتی نگرانی کے نظام میں خلل پیدا کیا، کمیونیکیشن ہارڈ ویئر کو تباہ کر کے بھارتی ویب سائٹس کو ہیک کیا۔ ذرائع کے مطابق پاکستانی سائبر ٹیم نے بھارتی ہوائی اڈوں کے سرورز ٹیک ڈان کئے اور بھارتی فضائیہ کے مواصلاتی نظام اور ریلوے کے نظام میں بھی خلل پیدا کیا۔ پاکستانی سائبر ٹیم نے بھارت کے نیشنل، ایسٹرن، ناردرن اور ویسٹرن لوڈ ڈسپیچ سینٹرز تک رسائی حاصل کرکے سسٹم کو بھی ہیک کر لیا جس کے نتیجے میں بھارت کے تقریبا 80 فیصد صارفین کو عارضی طور پر بجلی کی فراہمی سے بھی محروم کر دیا گیا۔ ذرائع کے مطابق ریاست اتر پردیش میں 3600+ پاور فیڈرز،  جموں و کشمیر کے علاقے میں 600+ ، ریاست مہارشٹڑ 4600+  فیڈرز کی سپلائی کو ہیک اور منقطع کیا اس کے علاوہ پنجاب لوڈ ڈسپیچ سینٹر کے 2 مین AI سرورز، ریاست کرناٹک میں 235+ ونڈ اور سولر گرڈز کو ہیک کر کے  ناکارہ بنا دیا گیا۔ ذرائع کے مطابق ہندوستان پٹرولیم کارپوریشن لمیٹڈ، اندرا پرستھا گیس لمیٹڈ کے ڈیٹا بیس کو بھی ہیک اور ناکارہ کردیا گیا اور 4400+ سرکاری اور پبلک سیکٹر کمیونیکیشن راٹرز کو ناکارہ بنا دیا گیا۔ ذرائع کے مطابق تمام اہم ہندوستانی حکومت، ملٹری، ایئر فورس، اسٹاک ایکسچینجز اور دیگر پبلک سیکٹر تنظیموں کے سرورز پر DDoS حملہ کیا گیا جس کے نتیجے میں ای میل/OTP ورک فلو اور اندرونی مواصلات میں قومی خلل  پیدا کیا گیا۔ اس کے علاوہ سرکاری عمارتوں، شاہراہوں، ہسپتالوں اور دیگر عوامی زونز کے 3500+ سی سی ٹی وی کیمرے ہیک کیے گئے۔ مقبوضہ جموں و کشمیر میں  250+ اہم ISP کمیونیکیشن راٹرز کو ہیک کرکے ناکارہ بنادیا گیا جبکہ 90 سے زیادہ سرکاری اور کارپوریٹ سیکٹر کی ویب سائٹس کے ڈیٹا کو ہیک کرلیا گیا۔ اس میں بھارتی فضائیہ، ہندوستان ایروناٹکس لمیٹڈ، بارڈر سیکیورٹی فورس، ہندوستان کی منفرد شناختی اتھارٹی اور ہندوستانی ریلوے شامل ہیں۔ ذرائع کے مطابق بھارتی ہوائی اڈوں کے سرورز کو بھی ہیک کیا گیا اس میں ممبئی، دہلی اور  کولکتہ شامل ہیں۔ ذرائع کے مطابق آپریشن بنیان مرصوص کے دوران بھارتی فضائیہ کے مواصلاتی نظام میں خلل پیدا کیا گیا جس میں بھارتی فضائیہ کی نادرن، سدرن اور ویسٹرن ایئر کمانڈ شامل ہیں۔ بھارتی ریلوے کے مختلف سرورز کو بھی ہیک کیا گیا جس سے بھارت کے متعدد علاقوں میں ریلویز آپریشن متاثر ہوئے۔