لاہور(کامرس رپورٹر)پنجاب کے وزیر برائے اقلیتی امور سردار رمیش سنگھ اروڑہ نے کہا جلد معاشی استحکام حاصل کرنے کیلئے اقلیتوں کی شمولیت یقینی بنانا ہوگی۔ وہ لاہور چیمبر آف کامرس اینڈ انڈسٹری میں ایک خصوصی تقریب سے خطاب کر رہے تھے۔اس موقع پرصدر لاہور چیمبر میاں ابوذر شاد، انجینئر خالد عثمان، شاہد نذیر چودھری، صدر علی حسام اصغراور ہیومن رائٹس فار مائنارٹیز سٹینڈنگ کمیٹی کے کنوینر سلیم شاکرنے بھی خطاب کیا۔ دورہ بین المذاہب ہم آہنگی، اقلیتوں کو بااختیار بنانے اور معیشت میں شمولیت کے عزم کا عکاس تھا۔سردار رمیش سنگھ اروڑہ نے کہا اقلیتیں پاکستان کی ترقی میں ایک کلیدی کردار ادا کر رہی ہیں اور انہیں معاشی پالیسی سازی، تجارت اور کاروباری ترقی جیسے اہم شعبوں میں مکمل طور پر شریک کیا جانا چاہیے۔ حکومت اقلیتوں کو قومی دھارے میں شامل کرنے کیلئے پرعزم ہے۔ وقت آگیا ہے کہ اقلیتی کاروباری افراد کیلئے مخصوص سہولیات فراہم کی جائیں اور ان رکاوٹوں کو ختم کیا جائے جو ان کی ترقی کی راہ میں حائل ہیں۔ انہوں نے وزیراعلیٰ مریم نواز کی اقلیت دوست پالیسیوں کو سراہتے ہوئے کہا ان کی قیادت میں ایک برداشت اور شمولیت پر مبنی معاشرہ ابھر رہا ہے جو بانی پاکستان قائداعظم کے ویڑن کی عکاسی کرتا ہے۔