لاہور(سپورٹس رپورٹر)ملک میں کرکٹ کی بہتری کیلئے ڈائریکٹر ہائی پرفارمنس عاقب جاوید نے اہم پلان پیش کردیا۔ذرائع کے مطابق پلان قومی کرکٹ ٹیموں، شاہینز ، ایمرجنگ اور ایج گروپس ٹیموں کیلئے تیار کیا گیا ہے جسے ڈائریکٹر ہائی پرفارمنس عاقب جاوید نے منظوری کیلئے پیش کیا ہے۔ذرائع کا بتانا ہے کہ پلان کے تحت بائیومکینکس لیب کو مقامی یونیورسٹی سے نیشنل کرکٹ اکیڈمی لاہور منتقل کرنیکاپلان ہے، کرکٹرز کو جدید آلات اور سافٹ وئیرز کیساتھ ٹریننگ دی جائیگی۔ فیصل آباد اور سیالکوٹ کے ہائی پرفارمنس سینٹرز کو بھی آباد کرنے کا منصوبہ ہے، سیالکوٹ میں انڈر 13 اور انڈر15 ایج گروپس کے کھلاڑیوں کے پروگرامز ہونگے جبکہ فیصل آباد میں انڈر 17 ایج گروپ کے کھلاڑیوں کے طویل ٹریننگ پروگرام ہوں گے۔ نیشنل کرکٹ اکیڈمی میں 30 سے 35 کرکٹرز کی ٹریننگ قومی ٹیم کی بنچ سٹرنتھ کیلئے ہو گی جبکہ ملتان میں انڈر 19 اور کراچی میں ویمن کرکٹرز کے سینٹرز ہوں گے۔ ٹیسٹ سیریز کی ابھی سے تیاری کیلئے بھی پلان تیار کر لیا گیا ہے، ریڈ بال کیلئے فوری طور پر ہیڈ کوچ مقرر نہیں کیا جا رہا جبکہ ریڈ بال ہیڈ کوچ کیلئے مصباح الحق سمیت کئی نام زیر غور ہیں۔