کیف (نیٹ نیوز) یوکرائنی حکام نے بتایا اتوار کی صبح شمالی شہر سومی کے مرکز میں 2روسی بیلسٹک میزائلوں کے حملے میں 32 افراد ہلاک اور 84 سے زائد زخمی ہو گئے۔ یوکرائن کے صدر ولادیمیر زیلنسکی نے حملے کی مذمت کی  جبکہ یہ حملہ اس سال یوکرائن پر کیے جانے والے سب سے مہلک حملوں میں سے ایک ہے، انہوں نے روس کے خلاف سخت بین الاقوامی ردعمل کا مطالبہ بھی کیا۔ یوکرائن کے صدر نے سوشل میڈیا پلیٹ فارم پر جاری بیان میں کہا کہ "صرف بدمعاش ہی ایسا کام کر سکتے ہیں، عام لوگوں کی جانیں لے رہے ہیں۔ انہوں نے ویڈیو کے ساتھ لکھا جس میں زمین پر نعشیں، تباہ شدہ بس اور شہر کی سڑک کے بیچ میں جلی ہوئی کاریں دکھائی دے رہی تھیں۔ یہ حملہ ایسے دن کیا گیا جب کہ لوگ چرچ جاتے ہیں، یہ دن پام سنڈے ہے۔ وزیر داخلہ نے کہا کہ حملے کے وقت شہری سڑکوں، گاڑیوں، پبلک ٹرانسپورٹ اور عمارتوں میں موجود تھے۔ زیلینسکی کے چیف آف سٹاف نے کہا کہ میزائلوں میں کلسٹر گولہ بارود تھا، روسی زیادہ سے زیادہ شہریوں کو مارنے کے لیے ایسا کر رہے ہیں۔ یوکرائن میں موجود بھارتی سفارتخانے نے دعویٰ کیا ہے کہ روس کے ایک میزائل حملے میں کیف میں واقع ایک بھارتی دوا ساز کمپنی (کسم ) کے گودام کو نشانہ بنایا گیا ہے۔ میڈیارپورٹس کے مطابق یوکرائن میں بھارتی سفارتخانے الزام عائد کیا کہ ماسکو نے بھارت کے ساتھ خصوصی دوستی کے باوجود دانستہ طور پر بھارتی کاروبار کو نشانہ بنایا۔ سفارتخانے نے ایک ٹویٹ میں کہا، آج روسی میزائل نے یوکرائن میں بھارتی دوا ساز کمپنی کسم کے گودام کو نشانہ بنایا۔ ماسکو ایک طرف بھارت سے خصوصی دوستی کا دعویٰ کرتا ہے، دوسری جانب بھارتی کاروبار کو جان بوجھ کر نشانہ بنا رہا ہے، بچوں اور بزرگوں کے لیے مخصوص ادویات کو تباہ کر دیا گیا۔ادھر، برطانیہ کے یوکرائن میں سفیر مارٹن ہیریس نے بھی کہا کہ روسی حملے میں کیف میں ایک بڑی دوا ساز کمپنی کا گودام تباہ کر دیا گیا۔