کراچی(کامرس رپورٹر) ماہ فروری 2025ء کے دوران کارکنوں کی جانب سے پاکستان بھیجی گئی ترسیلات زر میں ماہ بہ ماہ بنیادوں پر 3.8 فیصد اضافہ رہا۔فروری میں کارکنوں کی جانب سے بھیجی گئی ترسیلات  میں 3.1 ارب ڈالر کی آمد درج کی گئی۔ نمو کے لحاظ سے ترسیلات زر میں سال بسال بنیادوں پر 38.6 فیصد اضافہ ہوا۔ مجموعی طور پر جولائی تا فروری مالی سال 25ء کے دوران 24.0 ارب ڈالر کی آمد کے ساتھ کارکنوں کی ترسیلات زر میں 32.5 فیصد اضافہ ہوا‘جبکہ جولائی تا فروری مالی سال 24ء کے دوران 18.1 ارب ڈالر موصول ہوئے تھے۔ فروری 2025ء کے دوران کارکنوں کی ترسیلات زر زیادہ تر سعودی عرب (744.4 ملین ڈالر)، متحدہ عرب امارات (652.2 ملین ڈالر)، برطانیہ (501.8 ملین ڈالر) اور ریاست ہائے متحدہ امریکہ (309.4 ملین ڈالر) سے موصول ہوئیں۔