قومی ٹونٹی 20 ٹورنامنٹ کا آغاز....28 فروری سے کراچی میں ہو گا : ملک بھر سے 13 ٹیمیں شرکت کرینگی
لاہور+اسلام آباد ( سپورٹس رپورٹر+اے پی پی) پاکستان کرکٹ بورڈ کے زیر اہتمام قومی ٹوئنٹی 20 کرکٹ کپ 28 فروری کو کراچی میں شروع ہو گا۔ طے شدہ شیڈول کے مطابق یہ ٹورنامنٹ 27 فروری سے شروع ہونا تھا لیکن 12 ربیع الاﺅل کے دن کی وجہ سے ایک دن کی تاخیر سے شروع ہوگا۔ پاکستان کے مایہ ناز کرکٹرز قومی ٹونٹی ٹونٹی کرکٹ ٹورنامنٹ میں ایکشن میں نظر آئیں گے ۔محمد سمیع کراچی ڈولفنز کی قیادت کریں گے ۔دانش کنیریا کراچی زیبراز، اور شعیب اختر اسلام آباد کی کپتانی جبکہ یونس خان کو ایبٹ آباد کا کپتان بنایا گیا ہے سلمان بٹ لاہور لائنز کی کپتانی جبکہ مصباح الحق فیصل آباد کی اور تین بار کی چیمپئن سیالکوٹ کے کپتان شعیب ملک ہو ں گے ۔ایونٹ میں ملک بھر سے 13 ٹیمیں شرکت کریں گی جن میں کراچی ڈولفنز، کراچی زیبراز، کوئٹہ اسلام آباد، راولپنڈی ریمز، ملتان ٹائیگرز ، ایبٹ آباد، حیدر آباد ہاکس، لاہور لائنز ، لاہور ایگلز، پشاور پینتھرز، فیصل آباد، ڈولفنز اور سیالکوٹ سٹالینز کی ٹیمیں شامل ہیں۔ آرگنائزز حکام نے کہا ہے کہ ایونٹ کے کامیاب انعقاد کیلئے تمام تر انتظامات کو وقت سے پہلے مکمل کر لیا جائے گا۔