سپریم کورٹ کی ویب سائٹ ہیک ”چیف جسٹس معاشرہ میں ظلم اور بدعنوانی کے خاتمہ میں کردار ادا کریں“: ہیکر
اسلام آباد (نمائندہ نوائے وقت) سپریم کورٹ آف پاکستان کی ویب سائٹ ہیک کر لی گئی اور ہیکر کی جانب سے ویب سائٹ پر قابل اعتراض تحریریں لکھی گئی ہیں۔ ویب سائٹ پر اپنا نام زامبی کے ایس اے ظاہر کرنے والے ہیکر نے چیف جسٹس آف پاکستان افتخار محمد چوہدری کو مخاطب کرتے ہوئے کہا ہے کہ وہ پاکستانی ہیں غیر ملکی نہیں اور ظلم کیخلاف آواز بلند کرنا چاہتے ہیں۔ ہیکر نے چیف جسٹس سے درخواست کی ہے کہ معاشرہ ظلم اور بدعنوانی کا شکار ہے۔ چیف جسٹس صاحب اپنا کردار ادا کریں اور غریبوں کی مدد کریں۔ ہیکرز نے پاکستان میں قابل اعتراض ویب سائٹ پر پابندی عائد کرنے کا بھی مطالبہ کیا۔ ہیکرز نے پی ٹی اے کی ویب سائٹ بھی ہیک کرنے کی دھمکی دی ہے۔