پاک ویسٹ انڈیز ٹی ٹوئنٹی سیریز کیلئے ٹریفک پلان مرتب
کراچی(اسپورٹس رپورٹر) پاکستان اور ویسٹ انڈیز کے درمیان تین میچز پر مشتمل ٹی ٹوئنٹی سیریزکے سلسلے میں پی ایس ایل فائنل کے ٹریفک پلان کو برقرار رکھا گیا ہے۔ٹریفک پولیس کے مطابق میچز کے روز شارع فیصل پر کارساز سے نیشنل اسٹیڈیم جانے والی سڑک ٹریفک کے لئے بند ہوگی اور گاڑیوں کو ڈرگ روڈ اور وہاں سے راشد منہاس روڈ کی جانب بھیجا جائے گا۔ ٹریفک پولیس کی جانب سے ترتیب دیے گئے پلان کے مطابق راشد منہاس روڈ سے براستہ ڈالمیا روڈ اسٹیڈیم جانے والی سڑک بھی بند رکھی جائیگی اور نیپا سے مزار قائد تک یونیورسٹی روڈ اور نیو ایم اے جناح روڈ بھی بند رہے گی۔ ٹریفک پولیس کا کہنا ہے کہ لیاقت آباد دس نمبر سے نیشنل اسٹیڈیم جانے والی سڑک ٹریفک کے لئے بند ہوگی اور وہاں سے آنے والی ٹریفک کو کریم آباد اور عائشہ منزل کی طرف موڑا جائے گا۔ٹریفک پولیس کے مطابق میچ دیکھنے کے لئے آنے والوں کے لئے مخصوص مقامات پر پارکنگ رکھی گئی ہے جن میں گلشن اقبال حکیم سعید گرانڈ، اردو یونیورسٹی گرانڈ اور سنڈے بازار گرانڈ میں ہوگی۔ٹریفک پولیس کا کہنا ہے کہ ڈالمیا روڈ پر غریب نواز فٹبال گرانڈ میں بھی پارکنگ کا انتظام کیا گیا ہے جب کہ کشمیر روڈ پر کے ایم سی گرانڈ، کے ڈی اے کلب اور چائنا گرانڈ میں پارکنگ رکھی گئی ہے۔