سسی پلیجو کا پانی کی تقسیم میں سندھ کیساتھ ناانصافی پر احتجاج
اسلام آباد (نمائندہ خصوصی) پیپلز پارٹی کی رہنما سینیٹر سسی پلیجونے ارسا کی طرف سے پانی کی تقسیم میں سندھ سے کی جانے والی ناانصافی پر سخت احتجاج کرتے ہوئے کہا ہے کہ سندھ میں پینے اور زراعت کے لئے پانی دستیاب نہیں۔ ضلع ٹھٹھہ اور بدین پانی کی کمی کا شکار ہے۔ انہوں نے کہا کہ ارسا 1991ء کے معاہدے پر بھی عملدرآمد کرنے کے لئے تیار نہیں اور سندھ کے پانی پر اعتراضات کر رہا ہے۔ سینیٹر پلیجو نے کہا کہ وفاق نے بجلی اور گیس کی طرح پانی میں بھی ناانصافی کرکے سندھ کو انتقام کا نشانہ بنایا ہے۔ انہوں نے کہا کہ وفاق کی جانب سے سندھ کی مرضی کے خلاف لائی گئی کوئی بھی واٹر پالیسی قبول نہیں کی جائے گی۔ سینیٹ کے آئندہ اجلاس میں ارسا کی ہٹ دھرمی اور سندھ دشمن پالیسی پر بھرپور احتجاج کیا جائے گا۔