کراچی(اسپورٹس رپورٹر)نیوزی لینڈ کے خلاف ون ڈے سیریز میں شکست اور ٹی ٹوئنٹی سیریز میں کامیابی کے بعد قومی کرکٹ ٹیم کے کپتان سرفراز احمد اور فاسٹ بولر رومان رئیس کراچی پہنچ گئے۔ٹی ٹوئنٹی کی نمبر ون ٹیم کے کپتان سرفراز احمد نے ائرپورٹ پر میڈیا نمائندگان سے بات کرنے سے گریز کیا اور اس کی وجہ بتائی کہ پی سی بی نے انہیں میڈیا سے بات کرنے سے منع کیا ہے۔اس موقع پر بولر رومان رئیس نے میڈیا سے گفتگو کرتے ہوئے کہا کہ بھرپورکوشش کی لیکن ون ڈے میں کبھی بولنگ نہ چلی تو کبھی بیٹنگ۔بولر کا کہنا تھا کہ انہیں ٹی ٹوئنٹی میں نمبر ون ٹیم بننے پر بیحد خوشی ہے۔پاکستان کرکٹ ٹیم دورہ نیوزی لینڈ میں5 ون ڈے میچوں کی سیریز 5-0صفر سے ہاری، لیکن تین میچوں کی ٹی ٹوئنٹی سیریز2-1 سے جیت کر نہ صرف قوم کی تھوڑی بہت لاج رکھی بلکہ آئی سی سی ٹی ٹوئنٹی رینکنگ میں نمبرون ٹیم بھی بن گئی۔ قومی ٹیم کے کپتان سرفراز احمد نیوزی لینڈ سے کراچی واپس پہنچے تو ایئرپورٹ پر امیر اکرم خان، سعد چوہدری، جاوید بلوچ، محمد ادریس ودیگر نے قائد اعظم ایئرپورٹ پر ان کا شاندار استقبال کیا اورانہیں ٹی ٹوئنٹی سیریز میں شاندار کامیابی حاصل کرنے اور ورلڈ رینکنگ میں بحیثیت کپتان پہلی پوزیشن حاصل کرنے پر دلی مبارکباد پیش کی اور انہیں گلدستہ اور ہار پہنانے کے ساتھ ان پر گل پاشی بھی کی۔ رومان رئیس بھی کپتان سرفراز امد کے ہمراہ تھے۔