چارسدہ (آئی این پی) چارسدہ کے علاقے شبقدر میں نجی سکول میںدہشتگروں کی حملے کی کوشش پولیس اور اہل علاقہ نے ناکام بنادی ،حملہ آور فرار ہونے میں کامیاب ہوگئے، پولیس کی بھاری نفری نے علاقے کو گھیرے میں لے کر سرچ آپریشن شروع کر دیا۔ تفصیلات کے مطابق جمعرات کو چارسدہ کے علاقے شبقدر میں نجی سکول کے قریب مسلح افراد نے فائرنگ کی اور سکول میں گھسنے کی کوشش کی لیکن فوری طور پر مساجد میں اعلانات کے بعد مقامی لوگوں نے جوابی فائرنگ شروع کردی جس پر حملہ آور موٹرسائیکل پر فرار ہوگئے تاہم یہ واضح نہیں ہو سکا کہ ممکنہ حملہ آوروں کی تعداد کتنی تھی۔ پولیس ذرائع کے مطابق شبقدر کے علاقے میں واقع عرفان پبلک سکول پر حملے کی کوشش ناکام بنائے جانے کے بعد علاقے میں سرچ آپریشن شروع کر دیا گیا جبکہ سکول کے اردگرد سکیورٹی فورسز کی بھاری نفری تعینات کردی گئی۔ نجی ٹی وی کے مطابق 6حملہ آور طالبات کو یرغمال بنانے کی کوشش میں تھے۔