کراچی (آن لائن) وفاقی احتساب عدالت نے پیپلزپارٹی کے رہنما مخدوم امین فہیم کی 11 مقدمات میں قبل ازگرفتاری ضمانت منظور کر لی ہے۔تفصیل کے مطابق وفاقی احتساب عدالت نے ٹریڈ ڈویلپمنٹ اتھارٹی میں مبینہ طور پر اربوں روپے خوردبردکرنے کے متعلق مقدمہ میں پیپلز پارٹی کے رہنما مخدوم امین فہیم کی 11مقدمات میں 50,50 ہزار روپے کی 5نومبر تک قبل ازگرفتاری ضمانت منظور کر لی ہے۔ مخدوم امین فہیم کے وکیل کی جانب سے عدالت میں درخواست دائر کی گئی تھی کہ مخدوم امین فہیم بیمار ہیں وہ عدالت نہیں آسکتے ہیں۔ عدالت 12مقدمات میں ان کی پہلے ہی ضمانت منظورکر چکی ہے۔ عدالت نے درخواست منظورکرتے ہوئے 5نومبرتک قبل ازگرفتاری ضمانت منظورکر لی۔ واضح رہے کہ ٹریڈ ڈویلپمنٹ اتھارٹی میں خوردبرد کے مقدمہ میں سابق وزیراعظم یوسف رضا گیلانی سمیت کئی ملزمان کی عدالت پہلے ہی ضمانت منظورکر چکی ہے جبکہ مذکورہ 11مقدمات میں مخدوم امین فہیم کی بیرون ملک ہونے کی وجہ سے عدالت ان کے ناقابل ضمانت وارنٹ جاری کئے گئے تھے۔