پاکستان 84 ارب ڈالر کا مقروض‘ پیسے کا مصر ف کہیں نظر نہیں آتا‘ چیئرمین نیب

30 مارچ 2018

اسلام آباد(نا مہ نگار) چیئرمین نیب جسٹس(ر) جاوید اقبال نے کہا ہے کہ ’’احتساب سب کیلئے‘‘ کی پالیسی پر پختہ یقین رکھتے ہیں۔ بدعنوانی ایک ناسور ہے جس کے خاتمہ میں ہی ملک کی ترقی اور خوشحالی کا راز مضمر ہے، تمام انکوائریاں اور انویسٹی گیشنز میرٹ، شفافیت اور قانون کے مطابق عمل جبکہ کرپشن سے متعلق شکایت کنندگان کی شکایات کو نیب قوانین کے مطابق نمٹایا جارہا ہے۔ان خیالات کا اظہار انہوں نے کھلی کچہری میں عوامی شکایات کی سماعت کے دوران کیا۔ چیئرمین نیب نے لوگوں کی جسٹس(ر) جاوید اقبال نے کہا کہ آج ملک تقریباً 84 ارب ڈالر کا مقروض ہے مگر اس قرض کے پیسے کا مصرف کہیں نظر نہیں آتا۔ انہوں نے کہا کہ ملک سے بدعنوانی کا خاتمہ صرف نیب نہیں بلکہ معاشرے کے ہر فرد کی ذمہ داری ہے کہ وہ نہ صرف خود کرپشن سے انکار کرے بلکہ اپنے اردگرد رہنے والے افراد کو بھی اس کینسر سے بچانے کیلئے اپنا کردار ادا کرے۔نیب کے افسربدعنوانی کے خاتمہ کو قومی فریضہ سمجھتے ہیں یہی وجہ ہے کہ قومی احتساب بیورو نے قوم کے لوٹے ہوئے تقریباََ 289 ارب روپے خزانہ میں جمع کروائے ۔