پاکستان پیپلز پارٹی کے فیصل صالح حیات اور فیصل کریم کندی نے آزاد امیدوار کے طور پر انتخابات میں حصہ لینے کی تردید کر دی

Jun 30, 2018 | 19:12

ویب ڈیسک

پاکستان پیپلز پارٹی کے مرکزی رہنما اور سابق وفاقی وزیر سید فیصل صالح حیات نے ان خبروں کو قطعی طور پر غلط، بے بنیاد اور گمراہ کن قرار دیا ہے جن میں کہا گیا ہے کہ وہ جھنگ سے آزاد امیدوار کے طور پر انتخابات میں حصہ لیں گے۔ پیپلزپارٹی کے میڈیا آفس سے جاری کئے گئے بیان میں سید فیصل صالح حیات نے کہا کہ میں پاکستان پیپلزپارٹی کے ٹکٹ اور تیر کے نشان پر الیکشن لڑ رہا ہوں۔ میں پیپلزپارٹی کا حصہ ہوں اور مجھے اس پر فخر ہے۔ مخدوم فیصل صالح حیات نے کہا ہے کہ میرے خلاف حقائق کے منافی خبریں چلانے والوں کے خلاف قانونی چارہ جوئی کا حق رکھتا ہوں۔اس کے علاوہ پاکستان پیپلزپارٹی کے پی کے جنرل سیکریٹری فیصل کریم کندی نے بھی کہا ہے کہ NA-38 سے پاکستان پیپلزپارٹی کے ٹکٹ اور تیر کے نشان پر الیکشن لڑیں گے۔ انہوں نے کہا کہ NA-37 کے حوالے سے میڈیا پر آنے والی تمام خبریں بے بنیاد ہیں۔

مزیدخبریں