ڈی جی نیب کی راغب نعیمی سے ملاقات  عوام کو دھوکہ دینے والی سکیموں پر شرعی رائے کیلئے اسلامی نظریہ کونسل سے معاونت طلب

اسلام آباد(خبرنگار) ڈائریکٹر جنرل نیب راولپنڈی وقار احمد چوہان اور ڈپٹی پراسیکیوٹر نیب سردار ظفر عباسی نے چیئر مین اسلامی نظریاتی کونسل ڈاکٹر راغب حسین نعیمی سے منگل کو ملاقات کی ترجمان اسلامی نظریاتی کونسل کے مطابق ملاقات میں ڈی جی نیب نے پاکستان میں کرپشن کے خاتمے کے حوالے سے نیب کے کردار کو واضح کیا اور تعمیرات کے حوالے سے عوام الناس کو مالی دھوکہ دینے والی مختلف سکیموں پر شرعی رائے کے لیے اسلامی نظریاتی کونسل سے معاونت طلب کی گئی ہے چیئرمین اسلامی نظریاتی کونسل نے پاکستان میں کرپشن کے خاتمہ کے حوالے سے نیب کے کردار کو سراہا اور کہا کہ چیئرمین نیب لیفٹیننٹ جنرل (ر) نذیر احمد کی سربراہی میں نیب کی فعالیت اور کار کردگی میں بہت اضافہ ہوا ہے چیئر مین اسلامی نظریاتی کونسل نے اس امر بارے کہا کہ کونسل اس معاملہ میں نیب کے ساتھ ہے اور جلد ہی عوام الناس کو مالی دھوکہ دینے کے مختلف انداز اور سکیموں کا شرعی تجزیہ کر کے کو نسل کی رائے نیب کو بھیجی جائے گی۔