پہلگام حملہ جھوٹ کا پلندہ، مودی حکومت کی چال، مسترد کرتے ہیں: ساہیوال میں قومی یکجہتی کانفرنس

 لاہور،ساہیوال،اسلام آباد (خصوصی نامہ نگار+ نمائندہ نوائے وقت+ ایجنسیاں+ اپنے سٹاف رپورٹر سے+ نوائے وقت رپورٹ) ڈویژنل انتظامیہ ساہیوال کے زیر اہتمام قومی یکجہتی کانفرنس کا انعقاد کیا گیا۔ چیئرمین مرکزی رؤیت ہلال کمیٹی پاکستان سفیر امن مولانا سید محمد عبدالخبیر آزاد نے کانفرنس کی صدارت کی۔ کمشنر ساہیوال ڈویژن شعیب اقبال سید، آر پی او محبوب رشید، ڈپٹی کمشنر ساہیوال شاہد محمود، ڈپٹی کمشنر اوکاڑہ احمد عثمان جاوید، ڈی پی او ساہیوال رانا طاہر الرحمن، ڈی پی او اوکاڑہ محمد راشد ہدایت سمیت دیگر ضلعی افسران، قاضی عبدالغفار قادری، علامہ حیدر نجفی، مفتی اسحاق ساقی، مولانا محمد احمد، علامہ ارشد عابدی، مولانا ڈاکٹر مختار احمد ندیم، مفتی شفیق اعوان، مولانا عبدالستار نیازی، مفتی مفتح محمد راشدی، ساہیوال سے مولانا سید ضیاء  اللہ شاہ بخاری، قاری عمربن عبدالعزیز، صاحبزادہ سید عبدالقادر آزاد، سید محمد عبدالبصیر آزاد، حاجی غلام حسین قریشی، علامہ شکیل الرحمن، مولانا احسان صدیقی، زونل ایڈمنسٹریٹر اوقاف ضیاء  المصطفی، مینجر اوقاف حسنین احمد سمیت ڈویژن بھر کے تمام مسالک کے جید علماء کرام نے بڑی تعداد میں شرکت کی۔ شرکاء نے ہاتھوں کی زنجیر بناکر اور قومی پرچم لہرا کر وطن سے محبت اور یکجہتی کا اظہار کیا۔ کانفرنس سے مولانا سید محمد عبدالخبیر آزاد نے خطاب کرتے ہوئے کہا کہ وطن عزیز پاکستان اللہ تعالیٰ کی نعمت عظمیٰ ہے جو اسلام اور کلمہ طیبہ کے نام پر حاصل کیا گیا اور لاکھوں انسانوں کی قربانیوں کے بعد معرض وجود میں آیا۔ پاکستان کی سلامتی و تحفظ کیلئے ہم سب ایک ہیں، علماء  کرام منبر و محراب کے ذریعے قومی یکجہتی،مذہبی ہم آہنگی اور ملکی وحدت کو پیدا کرنے میں اپنا کردار ادا کریں۔آپ تمام علماء کرام منبر ومحراب کے وارث ہیں،آپ نے ہمیشہ پاکستان کی یکجہتی، وحدت و اتحاد کیلئے عظیم کردار ادا کیا ہے۔ دہشت گردی و انتہا  پسندی کا خاتمہ، تشدد سے پاک معاشرہ، احترام انسانیت اور پیغام پاکستان کا فروغ ہم سب کی ذمہ داری ہے۔ مولانا سید محمد عبدالخبیر آزاد نے کہا کہ پہلگام حملہ جھوٹ کا پلندہ اور مودی حکومت کی چال ہے، جس کو ہم سب مسترد کرتے ہیں۔  مودی حکومت کو پاکستان کی ترقی ہضم نہیں ہوتی۔ انڈیا نے اگر جنگ مسلط کرنے کی کوشش کی تو ہم اپنے سپہ سالار کی قیادت میں بھارت کو منہ توڑ جواب دیں گے۔ ہم ایک متحد قوم بن کر ہی دشمن کو شکست دے سکتے ہیں۔ بھارت اور مودی کا ناپاک ایجنڈا پاکستان میں نہیں چلنے دیں گے۔ پاکستان کے استحکام اور خوشحالی کیلئے وزیر اعظم میاں محمد شہباز شریف اور سپہ سالار پاکستان حافظ جنرل عاصم منیر کا کردار قابل تحسین ہے۔ پاکستانی قوم ملک کے دفاع و استحکام کیلئے اپنی بہادر مسلح افواج اور قومی سلامتی کے اداروں کے ساتھ کھڑی ہے۔ تمام اسلامی ممالک غزہ و فلسطین پر اسرائیلی حملے اور جارحیت رکوانے کیلئے فیصلہ کن مؤثر کردار ادا کریں۔ حکومت پنجاب اور وزیر اعلیٰ مریم نواز شریف کا شکریہ ادا کرتے ہیں، وہ شب و روز پنجاب کی ترقی و خدمت میں پیش پیش ہیں جس میں صاف ستھرا پنجاب، خواتین کے حقوق، پنجاب تعمیر و تعلیم، صحت کی بہترین سہولتیں، مذہبی ہم آہنگی اور امن کے قیام میں ان کی کاوشیں قابل تحسین ہیں، جنہوں نے قومی یکجہتی کانفرنس کو کامیاب کروانے میں ہمارا ساتھ دیا۔ کمشنر ساہیوال شعیب اقبال سید نے کہا کہ نماز جمعہ کے خطبات میں عوام کو قومی یکجہتی کے حوالے سے زیادہ سے زیادہ آگاہی دی جائے۔ آر پی او محبوب رشید نے کہا کہ پاکستانی قوم ملک کے دفاع اور استحکام کیلئے اپنی بہادر مسلح افواج اور قومی سلامتی کے اداروں کے ساتھ کھڑی ہے۔