نہری تنازعہ پر راستوں کی بندش سے معیشت کو شدیدنقصان پہنچا:جمیل احمد 

 لاہور( کامرس رپورٹر)پاکستان انٹرنیشنل فریٹ فاروڈرز ایسوسی نے نے کہا ہے کہ نہروں کے تنازعہ پر راستوں کی بندش سے ہزاروں کنٹینرز پھنس جانے سے معیشت کو نا قابل تلافی نقصان ہوا ،برآمدی آرڈرز تاخیر کا شکار ہونے سمیت صنعتوں کے خام مال کی ترسیل نہ ہونے سے لاکھوں مزدور کا روزگار متاثر ہوا۔پاکستان انٹرنیشنل فریٹ فاروڈرز ایسوسی ایشن کے چیئرمین محمد جمیل احمد اور دیگر عہدیداران نے ملاقات کیلئے آنے والے ممبران سے گفتگو کرتے کہا کہ نہروں کے تنازعہ پر راستوں کی بندش کی وجہ سے ہزاروں کنٹینرز رکے رہے ، اس میں کنٹینرز کی بڑی تعداد ایکسپورٹ ہونے والی مصنوعات کی تھی ،ٹرانسپورٹرز کے کرایہ جات میں اضافے سے لاگت میں مزید اضافہ ہوا ہے ،خام مال کی ترسیل نہ ہونے کی وجہ سے صنعتیں بھی متاثر ہوئیںجبکہ کئی کنٹینرز میں پڑا سامان خراب ہونے کی بھی اطلاعات ہیں۔انہوں نے کہا کہ ہم حکومت کو سالانہ چھ ارب سے زیادہ ٹیکسز کی ادائیگی کرتے ہیں ، راستوں کی بندش سے فریٹ فاروڈرز کو بھی نقصان کا سامنا کرناپڑا ہے ، حکومت سے مطالبہ ہے کہ ہمارے نقصان کا بھی ازالہ کیا جائے۔